Qazaqstannyń Halyq ártisi Tuńǵyshbaı Jamanqulovtyń basyna qıyn kún týdy. Esimi el aýzynan túspeıtin ol mundaı «tanymal» eshýaqytta bolǵan emes. Tuńǵyshbaıdyń óner-talantyn moıyndaǵan jamıǵat ony jamandyqqa esh qımaıdy. «Facebook» áleýmettik jelisindegi oqyrmandar Jamanqulovqa arasha túsýde. Biri qoldaýyn óleń arqyly jetkizse, biri Elbasyna sóz úndeý tastady. qamshy.kz saıty óz kezeginde halyqtyń talap-tilegin nazarlaryńyzǵa usynady.
Bulbul Beıbitova – Tuńǵyshbaı aǵama
Men ne isteıin? Túńirengen keshteımin,
Dep jatyr ma qyranymdy keshpeımin.
Seniń nardaı qazaq syıǵan keýdeńde,
Qoımady ǵoı qoımady ǵoı keshpeı muń.
Qalaı ǵana qaralaýǵa dát bardy,
Qaıtem endi qazaqtaǵy jattardy.
Olar ózin qazaqpyn dep júrgenmen,
Shyn janashyr erlerimdi dattady.
Saqta Táńir jalǵan jala aıyptan,
Mynaý dala jalǵandyqtan jalyqqan
Seniń úniń júrekterdi pyshaqtap,
Tula boıyn tynyshtyqtan aıyqqan.
Estidi me qazaq seniń zaryndy,
Uly dalam ulylarǵa tabyndy.
Kózderinen kórgendeı bop shyndyqty,
Taba almadym qoıarǵa jer janymdy.
Shýaq bolyp jylytar adam janyn,
Meıir tógip, sergiter sanańda muń.
Qubylmaly jandardyń qylyǵyna,
Qaıran qalyp, oılanyp, alańdadym!
Adaldyqtan qashanda janady reń,
Adamdyqty joǵaltsań qalady neń?!
Uǵý jaqsy egilgen júrekterdi,
Kóńil emes, júrektiń janarymen!
Men ne deıin, sókpeńdershi narymdy,
Teatrda qalǵan jalǵyz barymdy.
E, Táńirim, qolda óziń, qorǵap al,
Qazaǵyma bitken uly daryndy.
«Qurmetti Elbasy!
Men Sándi Aqylaı jeti balanyń anasymyn. Sizdiń aldyńyzǵa baspana surap barmaı-aq qoıaıynshy. Óz kezegim kelgende alarmyn. Men myna vıdeony kórip jylap otyrmyn. Taıaqtyń eki ushy bar!? Tuńǵyshbaı aǵany da tyńdańyzshy. Eger meni ıt qapsa, qolym, júregim, basym, bári aýyrady. Al ónerdiń myna halge túsýi maǵan da taıaq bop tıdi. Sebebi men óleń jazamyn. Men súıip tyńdaǵan ánderdi, kórgen kınolarymdy, kórkem sózderdi óner arqyly Tuńǵyshbaı aǵam jetkizip talaı súısingen edim. Qazaq ónerine, ózimniń qazaq bolǵanyma qatty qýanatyn sezimder týǵyzǵan óner adamy edi. Tuńǵyshbaı aǵanyń men jerlesi de, tanysy da emespin. Arystanbek aǵany da jek kórip otyrǵam joq. Men Arystanbek aǵa basqarǵan bilim salasynda jumys jasap otbasymdy asyrap otyrmyn. Óner salasynan da alshaq emespin, sebebi óleńdi esim kirgeli serik etip kelemin. Arystanbek aǵa Tuńǵyshbaı aǵasymen túsinisýge kelip núkte qoıylsa eken. Siz sheshesiz osy jaǵdaıdy. Súrinbeıtin tuıaq bolmas dep atalar aıtqan edi. Men alys aýylda jatyrmyn. Qarapaıym ustaz anamyn. Saıasatqa esh qatysym joq. Adam retinde júregim aýyryp, aqyn retinde tolǵanyp tebirenip otyrmyn. Qazaqqa osy tynyshtyq jaqpaı otyr ma? Nege jaqsylyqty oılamaımyz? Elimiz aman jurt tynysh bolsa eken!
Men aqyn ana, ustaz Sándi Aqylaı»
Saıat Ábenov – Tulǵaǵa tusaý
Ańyz adam, taýdaı tulǵa – Tuńǵyshbaı,
Qoryp júrgen óz qazaǵyn qyzǵyshtaı.
Jese jesin, asasa da jarasar,
Kim jemeı júr osy kúnde kim quspaı?!
Tapqan eken, taqqan eken aıypty,
İsi qandaı aıybyna laıyqty?
Kóregender kórmeı qalyp kemeni,
Kórgen eken shette júzgen qaıyqty.
Jala jaýyp, jaǵyp otyr kúıesin,
Teatrdyń túsinbeıtin kıesin.
Jurt súıedi, egerde jurt qalasa,
Hannyń ózi soıar jalǵyz túıesin.
Alash qaıda óz ulyna qaraıtyn,
KSRO-nyń syzy bizde bar aıqyn.
«Jerim» degen erlerińdi qanaıtyn,
«Elim» degen erlerińdi qamaıtyn.
Biz otyrmyz ne bolar dep alańdap,
Jaǵympazdar jar salyp júr jamandap.
Arystardyń kúıin keshti... aqtalar,
Arystannyń aýzynan aman qap.
Aqtyń ózin qara qylyp qoıǵan shyn,
Qý saıasat qýlyq tabar oıdan sum.
«Tuńǵyshbaılar» ustalatyn kún jetse,
Bizdiń «Tuńǵysh prezıdent te» oılansyn!
Rashıd Jaqsylyqov – Ashyq xat
Asa qurmetti Nursultan Ábishuly!
Siz alysta, is-saparda júrgen kezińizde mazańyzdy alyp otyrmyn. Bul xatty jazýǵa sebep bolyp turǵan jaǵdaı – ol sońǵy kezde elimizdiń ishinde qyzý talqyda júrgen mádenıet mınıstri A. Muxamedıuly men xalyq ártisi T. Jamanqulovtyń arasyndaǵy túsinispeýshilik. El aldynda ótip jatqan aǵa men ininiń bitpes daýy kóńilimizge qaıaý túsirip júr. Keler urpaqqa aýyz birligimizdi mura qylyp qaldyrsaq dep armandaımyz, biraq ókinishke oraı ininiń aǵasynyń jaǵasyna jabysqan tárbıeni kórýge májbúr bolyp otyrmyz!
Qurmetti Nursultan Ábishuly, aǵamyzǵa arasha kórsetýińizdi suraımyz!
Qulaq salsań, Elbasy,
Oılaımyz-aý jaman joq.
Birin-biri dattaǵan,
Aqyldy bolǵan adam kóp.
Oza shapqan pendege,
Qaqpan bolǵan qadam kóp.
Sumpaıy jáne suryqsyz,
Bara jatyr zaman bop.
Óser eldiń balasy birin-biri qoldaıdy.
Birine-biri jaý bolsa,
Eliń úshin sol qaıǵy.
Mańdaıǵa bitken Tuńǵyshbaı,
Jasytyp alsaq jigerin,
Ókpeniń orny tolmaıdy.
Tuńǵyshbaıdaı ulyńa,
Arasha surap halqyń tur.
Qazaqtaı uly halqyńa,
Ónermen bolǵan altyn qul.
Úzbeıdi halyq kúderin.
Jasytýǵa jol berme,
Darynyńnyń jigerin.
Arasha bolshy arasha,
Sizden sony tiledim.
