Tarıhtyń oıly-qyrly belesterinde halyqtyń júreginde saqtalyp, jadynda jattalyp qalatyn, qoǵamdyq damýǵa aıryqsha áser etip, ulttyq sana-sezimge qozǵaý salatyn asa mańyzdy oqıǵalar bolady. Qazaq halqy úshin sondaı asýlardyń biri – 1986 jylǵy Jeltoqsan oqıǵasy.
Nursultan Nazarbaev
Almaty qalasy OKJ-niń №4 kitaphanasynda 9-shy qarasha kúni QR Prezıdenti syılyǵynyń laýreaty, QR Mádenıet qaıratkeri, Memlekettik «Daryn» jastar syılyǵy men Qazaqstan Jastar Odaǵy syılyǵynyń ıegeri, fılosofıa ǵylymdarynyń kandıdaty, Qazaqstan Jazýshylar Odaǵy men Jýrnalıser Odaǵynyń múshesi Bolatbek Tólepbergenniń dúnıeni dúr silkindirgen, Táýelsizdik týyn kótergen áıgili 1986 jyldyń jeltoqsan kóterilisiniń 30 jyldyǵyna oraı «Keremet medıa» baspasynan jaryq kórgen «Qasıettim – Jeltoqsan» atty jańa kitabynyń tusaýkeseri ótti.
Mádenı is-sharanyń maqsaty – asqaq tarıh 1986 jylǵy Jeltoqsan kóterilisi týraly jańa kitappen oqyrmandardy tanystyrý, Táýelsizdigimizdi baıandy etý jolynda jastardy qazaqstandyq patrıotızmge, Otanyn, týǵan elin súıetin ultjandy, eljandy azamat bolýǵa tárbıeleý. Atalmysh sharaǵa Almaty Polıgrafıalyq kolejiniń, Almaty jańa tehnologıalar kolejiniń, Almaty qarjy-quqyqtyq tehnologıalyq kolejiniń, Almaty kólik jáne komýnıkasıalar kolejiniń stýdentteri men ustazdary, jeltoqsan qaharmandary Amanǵazy Káripjanuly, Júrsin Tastekeev shaqyryldy.
Bolatbek Tólepbergen ulttyq máseleler, tarıhı aqtańdaqtar jáne demokratıa prınsıpteri, jańǵyryǵy jadymyzda jattalyp qalǵan Jeltoqsan kóterilisi týraly jaryqqa shyqqan «Kóshken kúnniń boıaýy», «Biz bilmeıtin Jeltoqsan», «1937-2007: Taýqymet pen taǵzym», «Máńgi jas – Alash ıdeıasy», «Jeltoqsan qarlyǵashtary», «Ulttyq ıdeıa – Táýelsizdik tuǵyry», «Biz osy ne bitirip júrmiz?» taǵy da basqa 20-ǵa jýyq kitaptyń avtory. Al, avtordyń «Qasıettim – Jeltoqsan» kitaby – 1986 jylǵy Almaty qalasyndaǵy Jeltqsan kóterilisiniń shyǵý sebep-saldary, oǵan qatysqan qazaq jastarynyń janqıarlyq erligi, qaısarlyǵy, qaharmandyq kúrestiń shynaıy beınesi týraly syr shertetin, tarıhymyzdy tarazylap, ótkenimizge ólsheý bolatyn, búginimizdiń bederin aıqyndaýǵa bastama bolar tarıhı qundy kitap.
QR Parlamenti Májilisiniń depýtaty, «Nur Otan» HDP Saıası keńesiniń búro múshesi, Jeltoqsan kóterilisine qatysýshy Nurtaı Sabılánov kitapqa jazǵan alǵysózinde «Táýelsizdik joly – aýyr jol. Sol joldaǵy aıtýly oqıǵa – 1986 jylǵy Jeltoqsan kóterilisi. Bul uly qubylysty keń kólemde nasıhattaý, jas urpaqtyń odan taǵylym alýyna jete mán berý – bizdiń qasıetti paryzymyz. Osy turǵyda jeltoqsantanýshy, zertteýshi, jýrnalıs Bolatbek Tólepbergenniń «Qasıettim – Jeltoqsan!» pýblısısıkalyq kitabynyń maqsaty – asqaq tarıh – 1986 jylǵy Jeltoqsan kóterilisi týraly jaqsy dúnıeni rýhanı aınalymymyzǵa qosý. Táýelsizdigimizdi baıandy etý jolynda jastarymyzdy tarıhı turǵyda tárbıeleýge úles qosý» - degen edi.
Kitaphana qyzmetkerleri kitap avtorynyń shyǵarmashylyq qyzmetimen, jańa kitaptyń mazmuny men bólimderimen oqyrmandardy arnaıy daıyndalǵan slaıd prezentasıa, beınesholýlar arqyly tanystyryp ótti. Oqý zalynda «Jeltoqsan shejiresi – elimniń mártebesi» kitap jaımasy uıymdastyrylyp, oǵan Jeltoqsan oqıǵasynyń shyǵý sebepterin, oǵan qatysqan jigerli jastarymyzdyń erlikterinen syr shertetin tarıhı, ádebı kitaptar qoıyldy.
Alǵashqy sóz kezegin alǵan kitap avtory Bolatbek Tólepbergen Jeltoqsan dúrbeleńiniń bastalý sebebi, namys otynyń alaýy júreginde janǵan qajyrly da jigerli, ór rýhty jastarymyz, erge bergisiz erlik tanytyp, qansha qınalsa da qaıyspaǵan qaısar qyzdarymyz jaıly jastarmen oı bólisti, azamattyq ustanymdaryn qaımyqpaı bildire otyryp, jastarǵa arasha túsip, qorǵan bolǵan azamattarymyzdyń da esimderin atap ketti.
Oqyrmandar kesh qonaqtaryna ózderin tolǵandyryp júrgen: «Táýelsizdik bizge ońaı keldi degen pikirge qalaı qaraısyz?», «Osy Jeltoqsan kóterilisi taqyrybyn zertteýińizge ne sebep boldy? Jáne de osy jolda aldyńyzdan kedergiler kezdesti me?», «Jeltoqsan oqıǵasy óz mártebesin tolyq aldy ma?», «Jeltoqsan qaharmandaryna memleket tarapynan qandaı qoldaýlar kórsetilip otyr?» syndy salmaqty da utqyr suraqtar qoıyp, salıqaly da utymdy jaýaptar alyp jatty.
Kitaphananyń daryndy oqyrmandary Almaty Polıgrafıalyq kolejiniń stýdenteri Erkin Jantas ózi shyǵarǵan «Jeltoqsan», Ámirqul İnkár Q.Rysqulbekovtiń «Jeltoqsan yzǵary», Erjan Aıala «Elim meniń», Almaty jańa tehnologıalar kolejiniń stýdenti Abaıdolla Nurgúl «Qazaqstan» óleń-jyrlaryn mánerlep oqyp berdi. Chaıkovskıı atyndaǵy Almaty mýzykalyq kolejiniń daryndy ónerpazdary Dúısenǵalıev Qýanysh, Jumatqan Abylaıhan «Baıtaq elim», «Egemen Qazaqstan», «Kók Týdyń jelbiregeni» atty merekelik patrıottyq án-shashýlaryn usyndy.
Tanymdyq keshten jastar qaýymy muz ústinde muń qalǵan qasiretti kezeńde namysy muqalmaǵan bozdaqtarymyzdyń jigeri men qaısarlyǵy jaıly biletin derekterin tolyqtyryp, tarıhtan mol taǵylym aldy.
Hametova Aıgerim
Almaty qalasy OKJ-niń №4 kitaphanasynyń qyzmetkeri
