Jaqynda 31 telearnasynan «Uıat emes» baǵdarlamasy qalyń kópshilikke jol tartty. Bul baǵdarlama belgili adamdardyń belgisiz qyrlary, jasyryn syrlary, osy ýaqytqa deıin elge aıtylmaǵan qupıalary jaıly syr shertedi. «Uıat emes» baǵdarlamasyn uıatsyzdyqqa balaǵan Murat Almasbekuly Feısbýk paraqshasynda mynadaı synı-pikir jazyp qaldyrypty:

"Uıat emes" degen myjyǵan baǵdarlama shyǵypty. "Uıat bolady" degen baǵdarlama nege shyqpaıdy onyń ornyna? El aldynda júrgen adamdardy stýdıaǵa shaqyryp alyp, «uıat emes» dep, sýyryla, suǵanaqtana suraq qoıyp, olardyń eń bir ókinishti, júrek aýyrtar sátterin, olardyń ómirindegi jarqyn sátin, eń bir júrek terber, ózgege úlgi bolar, jaqsy kóńil-kúı syılar jaılaryn nege aıtqyzbaıdy?

Anaý «ataqty adam, áıgili juldyz» degenderdiń baıynan taıaq jegeni, kúıeýiniń kózine shóp salǵany, nemese jaǵdaıy joq bolyp qalǵan kezderi, kúıeýiniń toqal alyp alǵany t.b. kimge qyzyq, kimge tańsyq. Jáne ony bylaıǵy jurttyń bári janashyrlyqpen tyńdap, sodan sabaq alady deý... Kóbi sony qyzyl ósek retinde tyńdap, aıyzy qanyp, erteń bireýge ósekteýge asyǵyp, jaıy kelse anany tabalap, kúlip otyrary anyq. «Jaman syryn aıtamyn dep shynyn aıtypty» degen sóz bar. Telearnalardyń aınaldyratyny sol bes ánshi. Árqaısysy ártúrli aıdar ashyp, at taǵyp solardyń ishek-qarnyna deıin aqtarýǵa ǵana mamandanǵandaı. Basqa qoldan keler saýatty dúnıesi joq bolǵan soń reıtıń jınaýdyń arzan, ózderi úshin «uıat emes» jolyn qýmaǵanda qaıtsin. Aýdıtorıa da osyndaı baǵdarlamalarǵa ábden baılanyp, esi-derti aýyp qalǵan. Endi ne istesin, olardyń sanasyn da jeńiltek qyz, kóńilshek kelinshektiń minezindeı qyzyl-jasylǵa, syldyr-suıyqqa ábden beıimdep tastasa.

Qazaq sonaý ata-babasynan beri "Uıat bolady" degen sózben jasap keledi. Sol uıat bolady talaı uıatty isterden saqtady. Ózimiz de sol «uıat bolady» degen halyqtyq moral kodeksimen kelemiz. Jaman bolǵan jerimiz joq. «Álemde uıattan sulý nárse joq» deıdi Sokrat. Ánshi, juldyzdar da adam. Bireýdiń otbasylyq máselesin, jan kúıinisin halyqtyń aldynda aıtqyzyp, ony «uıat emes» dep úrlep dabyraıtý uıatsyzdyqtyń naq ózi. Uıat emes degendi sanaǵa sińirgenshe, uıat bolady degen uǵymdy uıalatýǵa nege tyryspaımyz?! Onsyz da uıaty juqaryp, táni men jany jalańashtanyp bara jatqan qoǵamda uıat emes degen jarnama jasaý – úlken uıat".

Bul pikirge Feısbýk qoldanýshylary «Óte oryndy jazylǵan», «jamannan kesepat ... degen qazaq "mal qulaǵy sańyraý" dep kórgen aýyrtpashylyǵyna shúkir etip, jamandy jalpaq jurtqa jaımaýshy edi...» syndy pikirler qaldyrǵan.