Kórsetken kómegi kózboıaýshylyq bop shyqqan! Almatyda kezinde úılerin sý shaıyp ketken Shańyraq yqshamaýdanynyń turǵyndary Ahmetjan Esimovke ókpeli dep habarlaıdy www.ktk.kz. Ol shahar basshysy bolǵanda tasqynnan zardap shekken jurtqa jappaı jeńildikpen baspana saldyrtyp, al jerin kómek retinde bergizgen eken. Biraq arada jeti jyl ótkende, ol telimder tegin bolmaı shyǵyp, kezinde qala ákimimen birge qonys toıyn toılaǵan jurt endi dalada qalaıyn dep tur.
Sý tasqynynyń sońy qonys toıyna ulasyp, al kiltin sol kezdegi qala ákimi Ahmetjan Esimovtyń ózi tabystaǵan. Endi arada 7 jyl ótkende qaıtadan shyryldap qaldy. Óıtkeni kezinde memleket esebinen járdem retinde úı salyp bergen sheneýnikter ony jekeshelendirýge kelgende taǵy aqsha surapty.
Nurlyhan Maldybekov:
-Úkimetten satyp alýlaryń kerek deıdi. Al Úkimet bizge tegin berdi ǵoı jerdi. 270 myń kelisimde joq. Ol aqshany biz nelikten tóleýimiz kerek. Barlyqtarynda da kredıti bar moıyndarynda. 7 jyl boıy ózderi áreń tólep kelgende, endi kelip taǵy da 270 myń teńgeni qaıdan tóleıdi ol?
Dına Núsipbekova úıiniń aqysyn byltyr tólegen. Biraq ákimdiktegiler oǵan naq osy 270 myń teńgeni taýyp bere almaǵany úshin páterin jekeshelendirmeı qoıypty.
Dına Núsipbekova:
-Sý tasqynynan zardap shekkenderge berilgen baspananyń ózi bar-joǵy bir jarym bólme. 24 sharshy metr. Biraq sonyń ózi 7 jylǵa jalǵa bergender bir januıada tipti 7-i bala bolsa da, sol bir jarym bólmege jarty bólme qosýǵa da ruqsat etpepti.
Jurt bul shartyn da oryndaǵan. Biraq, sheneýnikter ýádesinde turmady. Óıtkeni Esimov kezinde tegin dep úlestirgen jerler 7 jyl ótkende ýaqytsha qoldana turýǵa berilgen bop shyqty.
Aleksandr Romanchıkov, Almaty qalasy ákimdigi kúrdeli qurylys kásiporny JSHS zańgeri:
-Jer de, úı de tegin berilgen joq. Tek qoldana turýǵa ǵana berildi. Jekege berilse tek úı beriledi. Zańǵa sáıkes turǵyndar jerdi jekege alý úshin satyp alýy qajet.
Osylaısha, kezinde úıin sý shaıǵan shańyraqtyqtarǵa bul joly da shańyraq buıyrmaı tur. Óıtkeni jerdiń aqysy tez arada tólenbegen jaǵdaıda, Esimov tabystaǵan kiltter keri qaıtarylýy múmkin.
