San-Fransıskoda biraz jyldan beri turatyn, osynda turaqty jumystary, jap-jaqsy tabystary bar úsh ózbek otbasy aıaq asty elderine kóshetin bolyp jatyr eken. Olardyń birimen, Bekzat esimdi jas jigitpen, shamaly kóztanystyǵym bar-tyn. Baıaǵyda bir juma namazda az-maz tildeskenimiz esimde. Sol Bekzatpen kórshi turatyn qazaq qyzynan álgi úsh otbasynyń ne sebepti kóshkeli jatqanyn estigende tań-tamasha boldym. Bylaı bolypty. Jańaǵy Bekzattyń bastaýyshta oqıtyn uly bir kúni mektepten bir sumyraı málimetpen kelipti.
- Dada, men úlkeıgende qyzǵa úılensem de, ulǵa úılensem de bolady eken.
Dadasy shaıyna shashaldy ma, kesesin túsirip aldy ma, álde odan da úlken bir nárse boldy ma eken, áıteýir shok alǵany anyq.
- Ony qaıdan shyǵardyń?
- Muǵalim aıtty.
Bekzat kóp oılanbapty. Sol kúni-aq Táshkenge bılet qaraı bastaǵan. Myna jaıtty estip, taǵy eki otbasy dereý jolǵa qamdanypty. Myna áńgimeden soń emosıonaldy assortı kúıin keshtim. Birese, ana muǵalimniń zulymdyǵyna ashýym keldi, birese, álgi ózbekterdiń qaltasynyń qalyńdyǵyna emes, adamdyq qalybynyń saqtalýyna qam jegen taqýalyqtaryna súısindim. Artynsha, óz balalarymdy ýaıymdaı bastadym. Batystyń bilim berýdegi jetistikterin jıi aıtyp júrmiz ǵoı, degenmen taıaqtyń eki ushy baryn kóp rette eskere bermeıdi ekenbiz. Ǵulamalar bylaı degen eken: "Úsh nárse adamnyń ólim aldynda ımanynan ajyraýyna sebep bolýy múmkin. 1. Imanynyń bar ekenine qýanbaý; 2. Imanymnan ajyrap qalam dep qoryqpaý; 3. Musylmanǵa zıan tıgizý."
Osynda túbegeıli qalýdy maqsat tutqan qazaq otbasylaryn bilemin. "Ózimiz úshin emes, balalardyń bolashaǵy úshin ǵoı bári de" dep aqtalyp jatady. Durys qoı, árkimniń óz joly, óz tańdaýy bar. Dese de, balalarynyń ımany úshin jyly oryndaryn sýytyp bara jatqan álgi úsh jigittiń áreketi úlgi alarlyqtaı kórindi maǵan. Balanyń bolashaǵyn shyn oılaǵan adam solardaı-aq bolsa kerek. Imanym - jıǵanym dep, dollardy pálen ese tómen sýmǵa aıyrbastap bara jatqan ol baýyrlardyń aldynan pálen ese artyq ıgilikter kútip turǵanyna óz basym kúmán keltirmeımin.
Murat Esjannyń facebook áleýmettik jelisindegi paraqshasynan alyndy
