Qazaq jazýshysy Qytaıdyń ádebı syılyǵyn jeńip aldy. Jaqynda Qytaı jazýshylar odaǵy men Qytaı ulttyq isteri kómıteti jaǵynan ótkizilgen respýblıkalyq «Tulpar» ádebı syılyǵyn enshilegen 25 týyndynyń qataryna jazýshy Orazqan Ahmetovtyń «Tulpardyń sońǵy tuıaǵy» atty povester jınaǵy kirdi, dep jazady Halyq toraby.
«Tulpar» ádebı syılyǵy Qytaıdaǵy tórt iri ádebı respýblıkalyq marapat «Maýdún», «Lýshún» jáne «Úzdik balalar ádebıeti» syılyqtarynyń qataryna kiretin az sandy ulttarǵa arnalǵan ádebı shyǵarmalardy sarapqa salatyn syılyq. Ol 1981 jyldan beri úsh jylda bir ret ótkizilip, aldaǵy ýaqytta tórt jylda bir ótkiziletin boldy. Onynshy ret ótkizilip otyrǵan respýblıkalyq «Tulpar» ádebı syılyǵyna talasýǵa 230 ádebı shyǵarma men 10 aýdarma kelip túsken. Birneshe aıǵa jalǵasqan dodada bes janr boıynsha 25 ádebı shyǵarma men 4 aýdarma alǵa shyqty. Sonyń qataryna Qytaı qazaqtarynan shyqqan jazýshy Orazqan Ahmetovtiń «Tulpardyń sońǵy tuıaǵy» atty povester jınaǵy kirip otyr.
Qart jazýshy atalmysh syılyqty úshinshi márte jeńip alyp otyr. Osy retki saıysqa qatysqan jınaǵyna avtordyń "Kásip tańdaǵan adam", "Burań jol", "Dúregeı", "Atamura", "Jármeńke", "Taýly qystaq ańyzy", "Tulpardyń sońǵy kóshi" atty povesteri jınaqtalǵan.
Maıra QAZYBEK
Derekkóz: baq.kz
Pikir qaldyrý