Bizdiń elde bilimdiler az, aqyldylar odan da dep bastalatyn Maqpal Meıirbekqyzynyń «Qamshydaǵy» maqalasy osy qysqa ǵana jazbany jazýyma túrtki boldy.

Rasynda da, nege ekenin kim bilsin, álde qoldaýshy – «kókeleri» bar ma, álde, reıtıń qýýǵa degen qumarlyq pa,  «Shirkin laıftaǵy» shýly tirliginen keıin Marjandy jarnamalaý, ony tok shoý bolsyn, ózgesi bolsyn baǵdarlamalardyń gúli etý úrdisi keńinen etek alyp ketti. «Qamshydaǵy» maqalada sóz etken «Sonymen, solaı deıik» deıtin baǵdarlamanyń ózinen talaı kórgen jaıymyz bar. Onyń ústine, jer órtep júrgen Sultanbaevaǵa áskerı baǵyttaǵy baǵdarlamanyń tizginin berip qoıyp qyzyq qylǵany taǵy bar «Habardyń». Bas arnanyń osy bir qyzdy anda súırep, mynda súırep jarnamalaýǵa ne úshin qushtar ekenin túsine almadym.

«Sobchaktyń sińlisi» dep aıdar taǵylǵan keıipkerdiń dıagnozy men bilsem – bireý. Tanymal bolý, dańqqa, ataqty bolýǵa degen qumarlyq Marjandy shekten shyǵaryp jibergen sekildi. Jarǵa jyqqan da sol.

Sultanbaevany «árbir adamnyń ne isteımin dese de ózi biledi, qandaı áreket jasasa da ol óziniń quqy, ne sóılese de ol onyń óziniń aýzy» degen sıaqty qıanpurys kózqaras qurtyp barady. Qoǵamdyq pikirdi elemeý, óziniń ulttyq, dildik, adamı sıpattarǵa qıas kelýin eskertýińdi tek qyzǵanysh degen qyzyl ıtten dep biletin bir pikirdi ózine qorǵanysh etip alý qandaı qıyn-aq. Bul jaıtty biz Maqpaldyń maqalasy shyqqan soń Marjannyń áleýmettik jelide atalǵan maqalany da qyzǵanysh dep sanaǵan pikirinen bildik.

Basqasy basqa, Marjannyń ózin «ózinshe» ustaýy eshkimniń de qyzǵanyshyn týǵyzatyn jaıt emes, aıanysh týǵyzatyn, baıǵus-aı deıtin jaǵdaı. Teledıdar tamashalaıtyn týys-jaqyndarymyzdan bilemin, Marjan efırge shyqsa, «mynaý qaıdan paıda boldy?» deıtinder kóp. Tek ony kózine, ózine kóbi aıta bermeıdi.

Árıne, árkimniń óz tańdaýy bar. Bul jerde eń ókinishtisi, Marjannyń qaısybir osyǵan deıin qazaq qoǵamyna jat bolyp kelgen keıbir jamandyqqa bastaıtyn qylyq, sózderden túren salýshy bolyp turǵany. Ol ózin mentalıtetti buza jarýshy, jańasha oılaýshy, kreatıv ıesimin dep oılap, osy pikirge maldanyp júrgen de bolýy múmkin.  Biraq qazir eldiń esinde qalatyn áreketter jasaýmen at shyǵarý, jer órteý, tanymal bolý túk emes. Bulaı shyǵarǵan atyna bolaıyn.

Qysqasha, óz oıymdy aıtýǵa berilgen konstıtýsıalyq quqymdy paıdalana otyryp, túıgenim, másele – Marjanda emes. Osy tárizdesterdiń qaýlaý qaýpinde. Aǵa-kóke, ápke-sińlilerdiń, janashyrdyń bir byp demeýinde. Iaǵnı álsizdigimizde eken másele.

Ózimiz álsizbiz. Telisi men tentegin tyıa almaǵan. Ózgege ne aıtamyz?