Búgin Qonaev qalasynda Almaty oblystyq «Dostyq úıi» ǵımaratynyń qurylysy bastaldy dep habarlaıdy Qamshy.kz aqparat agenttigi. Óńirdegi qoǵamdyq kelisim men etnosaralyq tatýlyqty nyǵaıtýǵa baǵyttalǵan mańyzdy jobany jergilikti iri kásipkerler óz qarajaty esebinen júzege asyrýda. Shara barysynda oblys ákimi Marat Sultanǵazıev pen QR Parlamenti Senatynyń depýtaty Janbolat Jórgenbaev oblystyq etnomádenı birlestikterdiń tóraǵalarymen birge ǵımarattyń irgetasyna ýaqyt kapsýlasyn saldy, – dep habarlaıdy Almaty oblysy ákiminiń baspasóz qyzmeti.

Saltanatty rásimge oblystyq máslıhat depýtattary, basqarma basshylary, zıaly qaýym ókilderi men kásipkerler, etnomádenı birlestikterdiń, aqsaqaldar men analar keńesiniń músheleri, Qoǵamdyq kelisim jáne damý ortalyǵynyń qyzmetkerleri qatysty. Qazirgi tańda óńirde 105 etnos ókili tatý-tátti ómir súrýde.

Oblysta tirkelgen 34 etnomádenı birlestik pen qoǵamdyq uıym túrli áleýmettik jobany qolǵa alyp, ózara tatýlyq pen senimdi arttyrýǵa qyzmet etýde. Sondyqtan bul «Dostyq úıi» atalǵan qurylymdardyń basyn biriktiretin qara shańyraqqa aınalmaq. Munda olardyń nátıjeli jumys isteýine barlyq jaǵdaı jasalyp, jastar bastamalaryn qoldaýǵa, pikir almasýǵa, mádenı jáne qoǵamdyq jobalardy júzege asyrýǵa múmkindik beretin zamanaýı orta qalyptasady.

Aımaq basshysy óz sózinde «Dostyq úıi» qurylysynyń bastalýy oblys úshin tarıhı mańyzy zor, aıtýly oqıǵa ekenin atap ótti.

«Memleket basshysy Qasym-Jomart Toqaev Qazaqstan halqy Assambleıasynyń 2025 jyly ótken HHHİV sesıasynda kópetnosty Almaty oblysynda «Dostyq úıin» salý qajettigi jóninde naqty tapsyrma bergen bolatyn. Búgin sol mańyzdy tapsyrmanyń júzege asýyna kýá bolyp otyrmyz. Ózderińizge belgili, memleket tarapynan oblysymyzdyń áleýmettik-ekonomıkalyq damýyna árdaıym aıryqsha qoldaý kórsetilip keledi. Sonyń nátıjesinde óńirimizde kásipkerlik pen óndiristiń órkendeýine mol múmkindikter ashyldy. Atap aıtqanda, 2022–2025 jyldar aralyǵynda Almaty oblysyna 3,7 trln teńge ınvestısıa tartyldy. Jalpy quny 930,3 mlrd teńge bolatyn 120 joba paıdalanýǵa berilip, onyń aıasynda 14 myń jańa jumys orny quryldy. Osy múmkindikterdi tıimdi paıdalanyp, óńir ekonomıkasynyń órkendeýine eleýli úles qosqan kásipkerlerimiz búgin «Dostyq úıin» óz qarajattary esebinen salýǵa qoldaý bildirý arqyly el aldyndaǵy azamattyq jaýapkershiliktiń joǵary úlgisin kórsetip otyr. Bul shańyraq el birligi men tatýlyqtyń ordasyna aınalady dep senemin», – dedi Marat Eleýsizuly.

«Assambleıa jastary» respýblıkalyq qoǵamdyq birlestiginiń Almaty oblysy boıynsha tóraǵasy Vera Pletneva jańa ǵımarat jańa múmkindikterge jol ashatynyn jetkizdi. «Búgin bárimiz tarıhı sáttiń kýási bolyp otyrmyz. Qazirgi tańda Qazaqstan 100-den astam etnos ókilin bir shańyraq astyna biriktirip, shynaıy dostyqtyń jarshysy bolyp otyr. «Birlik bar jerde tirlik bar» dep beker aıtylmaǵan. Bizdiń basty maqsatymyz – tatýlyqty tý etip, elimizdiń damýyna úles qosý. Al Almaty oblysynda «Dostyq úıiniń» boı kóterýi bizdiń jumysymyzǵa serpin berip, jańa belesterdi baǵyndyrýǵa septigin tıgizedi. Ásirese Assambleıa jastaryna úlken úmit pen jiger syılaıdy», – degen ol oblys ákimdigi men jobaǵa uıytqy bolǵan kásipkerlerge alǵys aıtty.

Nysan 2 qabatty, 1 bloktan turady. Joba boıynsha etno-mádenı ortalyqtar men birlestikter kabınetteri, 56 oryndy konferens-zal, 300 oryndy májilis zaly salynady. Sondaı-aq ǵımarat aldyna bıiktigi 92 metr bolatyn Tý tuǵyr ornatylady. Nysan qurylysy úsh aı boıy júrgizilip, jyl sońyna deıin paıdalanýǵa beriledi.