Aqmola oblysy Esil aýdanyndaǵy Dvýrechenskıı aýyldyq okrýginiń turǵyndary ákimniń ústinen shaǵym túsirgen, dep habarlaıdy sputniknews.kz jańalyqtary.

Olardyń aıtýynsha, ol balaǵat sózder aıtyp, tipti turǵyndardyń birine qol da jumsaǵan. Óıtkeni ákimge olardyń jınalysta qoıǵan suraqtary unamapty. 

Eki turǵynnyń shaǵymy boıynsha Aqmola oblysyndaǵy Memlekettik qyzmet isteri jáne jemqorlyqqa qarsy kúres agenttiginiń ádep jónindegi keńesi arnaıy tekseris júrgizgen. Tekseris materıaldaryna súıensek, qańtar aıynda aýylda jınalys ótip, onda turǵyndar ákimge kórshi aýylǵa aparatyn joldy jóndeý, qı-tezekti shyǵarýǵa qatysty suraqtar qoıǵan.

 Shaǵymdanýshylardyń biriniń aıtýynsha, bir kúnnen soń ákim Qaırat Mýsın onyń úıine jánen balasynyń jumysyna óńmeńdep baryp, óktemdik kórsetpekshi bolǵan. Ol bılik ókiline jaraspaıtyn qylyq kórsetip, balaǵattaǵan, tipti jigitke qol da jumsaǵan. Turǵynnyń aıtýynsha, ákimniń ózi keńestiń aldyna barǵanda qol siltegenin teriske shyǵarypty, tek daýys kóterip sóılegenin ǵana moıyndapty. 

Keńestegiler túsindirgendeı, aýyl ákimi óz qylyǵy arqyly memlekettik qyzmetshilerdiń ádep kodeksin buzǵan. Esil aýdanynyń ákimine Mýsınge qatań sógis jarıalaý usynyldy. 

Ádep kodeksin osy oqıǵadan birer kún buryn taǵy bir aýyl ákimi óreskel buzdy. Jarqaıyn aýdany Otradnyı selolyq okrýginiń ákimin ádep jónindegi keńes odan da qatal jazaǵa tartýdy uıǵardy. Aýdan ákimi aýyl basshysyn jumystan shyǵarýy tıis. 

Marat Muqanov rólge ashshy sý urttap alyp otyrǵan. 13 qańtar kúni Derjavınskide qyzmettik kóligin mingen ákimdi jol polıseıleri toqtatady. Onyń júrgizýshi kýáligi joq bolyp shyqty, medısınalyq tekseristen ótýden de  úzildi-kesildi bas tartqan. Munyń ústine polıseıdi basymen uryp, tisin syndyrǵan. «Batyrlyq» tanytqan ákimge qatysty ákimshilik hattama toltyrylyp, aıyppul salyndy. Sondaı-aq bılik ókiline qol jumsaǵany úshin sotqa deıingi tergeý júrgizilýde. 

Aıtpaqshy, osy oqıǵalardan keıin aýdan ákimi, aýdan ákimderiniń úsh orynbasary, aýdan apparatynyń jetekshisi, toǵyz aýyldyq okrýg ákimi, oblystyq basqarma basshysynyń orynbasary jaýapkershilikke tartyldy.