QR Mádenıet jáne sport mınıstri Arystanbek Muhamedıuly óziniń Facebook paraqshasyna jas ánshi Dımash Qudaıbergenniń I am a singer jobasynyń  7-shi kezeńinde aıtatyn ánine arnaıy baǵdarlama uıymdastyryp jatqanyn jazdy dep habarlaıdy Qamshy.kz.

Dımash buǵan deıin kelesi kezeńde qazaqsha án aıtatynyn habarlaǵan. Mınıstrdiń aıtýy boıynsha, án sımfonılyq orkestrdiń súıemeldeýimen aıtýdy josparlap otyr.

«Qazir biz Dımashqa arnap arnaıy baǵdarlama daıyndap jatyrmyz. Dımash keleshekte álemdik sahnada óner kórsetip, biz maqtanyshpen «Bul bizdiń Dımash Qudaıbergen» degen kúnge jetetinimizge senimdimin» deıdi Arystanbek Muhamedıuly.

Mınıstr buǵan deıin de birneshe márte Dımash Qudaıbergenniń ónerin baqylap, oǵan barynsha qoldaý bildirip júrgenin jazǵan.

Dımashtyń aspan asty elindegi «I am a singer» jobasyna sebepker bolǵan Ertaı Núsipjanov ekeni halyq arasynda belgili. Ol óziniń Facebook paraqshasynda Dımashtyń halyqaralyq jobalarda boı kórsetkenine Arystanbek Muhamedıuly sebepker boldy degenderdi synady.

«Dımash Qudaıbergen I Am a Singer jobasyna qalaı keldi?» degen saýal tóńireginde órbigen suhbatym jarıalanǵan kúni, Dımashty osy konkýrsqa qandaı qıyndyqtarmen betpe-bet kelip júrip qatystyrǵanymdy óz kózimen kórip júrgen Dımashtyń bir kómekshisi maǵan telefon soǵyp:

– Siz suhbat berip pe edińiz? – dedi.

– Iá, – dedim.

– Jańa mınıstrdiń ózi habarlasyp, menen «Ertaı degen kim?» dep surady, – dedi de, sózin túsiniksiz aıaqtady...

Al bir kún buryn Dımashtyń ákesi Qanat Aıtbaevtyń ulynyń osy jobaǵa qatysýyna qoldaý kórsetkeni úshin Mádenıet jáne sport mınıstrligine aıtqan alǵysy jarıa bolǵan edi... Osydan keıin-aq munda bir shıkiliktiń paıda bolǵanyn bilgenmin...

Endi mine, kúni keshe ǵana mınıstr Arystanbek Muhamedıuly: «..prı podderjke mınısterstva v 2015 godý Dımash prınál ýchastıe v mejdýnarodnom konkýrse «Slavánskıı bazar», gde stal obladatelem gran-prı, takje blıstatelno vystýpaet v dannoe vremá v kıtaıskom konkýrse professıonalnyh ıspolnıteleı «I am a singer»... ... vot eto ıavláetsá svıdetelstvom togo, chto my vypolnáem na kachestvennom ýrovne porýchenıa Glavy gosýdarstva», – dedi.

Jalpy, qazaqtyń bir uly bútin bir ulttyń rýhyn tý etip jelbiretip shyǵyp edi, ony «men tanyttym» deýshiler kóbeıdi. Meıli ǵoı, kóbeısin! Sebebi, talantty ul Qazaqtiki bolǵan soń, oǵan qaı qazaq qalaı maqtansa da jarasady, qalaı talassa da keshirimdi... Dımashtyń aınalasyna toptasyp úlken oqıǵanyń artynda ózderin kóp is tyndyryp júrgendeı kórsetkisi kelgen árbir janǵa men sondaı túsinistikpen qarap kelemin...

Eki jyl eńbektendim eken dep, istegen isimdi mindet qylmaımyn. Eńbegim baǵalansa eken dep te dámelenbeımin ári oǵan umtylmaımyn da. Sebebi, eńbekaqy talap etip, baǵalaý suraıtyndaı bul áldekimniń tapsyrysy emes! Men bul isti eshkimniń buıryǵymen, eshbir adamnyń tilegimen oryndaǵan joqpyn. Ári-beriden soń bul kez kelgenimizdiń moınymyzdaǵy – azamattyq paryz. Ult, óner aldyndaǵy árbir azamatqa júktelgen borysh dep túsinemin. Sol sebepti, suhbat alamyz degen barlyq jýrnalıserden bas tarttym. «Dımashty tanytqan menmin» degendeı, ár jerden bir jylt etip kórinýdi jón sanamaımyn. Dımashqa talantty bergen – Qudaı! Al men bir sebepker ǵanamyn... Muny, sondaı-aq, Qytaıda bilim alǵan soń, sol elge teńdessiz mádenıetimizdi tanytsam eken degen oıdan týǵan arman dep te aıta alamyn. Demek, men bar bolǵany óz armanyma adal eńbegimmen qol jetkizgen, sol arqyly halyqpen birge ólsheýsiz qýanyshqa bólengen osy eldiń baqytty bir azamatymyn.

Jahandaný dáýirinde ádep-ǵuryp, salt-sanamyzdy, mádenıetimizdi saqtap qalýdyń birden-bir joly – ony basqalarǵa pash etý. Qazaqtyń tól mádenıeti, ulttyq qundylyqtary bizge – qazaqqa ǵana qajet! Aýmaly-tókpeli zamanda qol qýsyryp otyrmaı nemese bılikke jaltaqtaı bermeı, shyn umtylsaq talaı bıikterdi jalǵyz júrip-aq baǵyndyrýǵa bolatynyn sózben emes, ispen dáleldegim de keldi... Al endi mınıstrdiń mádimdemesin qalaı túsinýge bolady? Osy jobaǵa qazaq ánshisin qatystyrý týraly ıdeıadan bastap, Dımashty konkýrs «esigine kirgizip jibergenge» deıingi eki jyl ýaqyt aralyǵynda istiń basy-qasynda júrgen men nege mınıstrliktiń qoldaýy bylaı tursyn, osy iske atsalysqan birde-bir mınıstrlik qyzmetkerin kóre almadym?! Mınıstr myrza qoldaýyn kimge, qalaı kórsetti? Ony qalaı, nemen dáleldeıdi? Nemese Arystanbek Muhamedıuly «Elbasy tapsyrmasyn joǵary deńgeıde oryndadyq» dep kimderdi meńzep tur?! Bul bireýdiń eńbegin paıdalaný emes pe? Eger qazir búkil kelissóz barysynyń qalaı júrgenin hat-habarymen birge jarıa etip jibersem, ol jerde aty-jóni birde-bir ret atalmaǵan mınıstrge uıat bolmaı ma? Nemese, «men edim» dep júrgen basqa da azamattar kimmen jáne qalaı kelissóz júrgizgenin, onyń qansha kezeńnen turǵanyn kórsetip bere ala ma eken? Iá, Arystanbek myrza «Daıdıdaýdy» ult aspaptar ansambliniń súıemeldeýimen oryndaýǵa járdem jasap jatyr eken. Ony eshkim joqqa shyǵarmaıdy. Biraq, orta joldan qosylyp, ózin alǵa shyǵarýyna bul azdyq etpeı me?

Jalpy, bul jaǵdaı tóńireginde aıtylyp jatqan kóp nárseni kórsem de kórmegendeı, estisem de estimegendeı kúı tanytyp júrmin... Sebebi, bul bizge (qazaqqa) abyroı ákelmeıdi. Jaza berse maǵan tom-tom kitap jazýǵa da bolar, bálkim... Biraq halyqqa qajetsiz, tek qazaqtardyń arasyna búlik týdyratyn dúnıeni aıtqyzýǵa, jazǵyzýǵa meni eshkim májbúrlemese eken deımin!" dep jazdy jýrnalıs Ertaı Núsipjanov.