«Nur Otan» partıasy oblystyq fılıalynyń tóraǵasy, oblys ákimi Qyrymbek Kósherbaev jas ertegishi Altynaı Berikti  qabyldady, dep habarlaıdy «Qamshy» portaly QazAqparatqa silteme jasaı otyryp.

         Altynaı Qyzylorda qalasynda turady. Kópbalaly otbasyndaǵy jeti balanyń ekinshisi. Ákesi qarapaıym jumysshy. Anasy bala tárbıesimen aınalysady. Ol qazir №267 mekteptiń 5-synybynda oqıdy. Ol 40-qa jýyq erteginiń avtory. «Aq kójek», «Móldir bulaq», «Qyzyl qoraz», «Túıe», «Qamqorlyq» syndy týyndylarymen túrli respýblıkalyq baıqaýlarda top jarǵan. Ol qıal-ǵajaıypqa toly áńgimelerdi 7 jasynan bastap jazypty. Budan bólek túrli taqyryptaǵy óleńderi men áńgimeleri bar. Altynaı «Uqpasqa aıtqan sóz jetim» atty ertegisimen eń jas avtor retinde «Meniń ǵajaıyp ertegim» kitabyna engen.  Elbasy Nursultan Ábishuly Nazarbaev Altynaıǵa óziniń «Eýrazıa júreginde» atty kitabyn syıǵa tartqan edi. Qabyldaýynda bolǵan ónerli balǵynǵa Qyrymbek Kósherbaev shyǵarmashylyq órleý tilep, óz rızashylyǵyn bildirdi. Jáne Altynaıdyń barlyq týyndylardy jınaqtap, ertegiler kitabyn shyǵarý ótinishine sáıkes «Nur Otan» partıasy oblystyq fılıaly atynan qarjylaı kómek kórsetildi.