Erte sóngen jaryq juldyz, akademıalyq teatrdyń ártisi marqum Shalqar Úrkimbaevtyń otbasy dalada qalmaq. M.Áýezov atyndaǵy akademıalyq drama teatrynyń basshysy marqumnyń otbasyn qyzmettik  jataqhanadan qýyp jatyr. Al aıadaı ǵana bólmede turyp jatqan kóp balaly ana kimnen arasha suratyn bilmeı dal, dep habarlaıdy Almaty telearnasy.

Talantty akter  Shalqar Úrkimbaev 29 jasynda beligisiz jaǵdaıda kóz jumdy. Akterdyń  3-qabattaǵy grım bólmesiniń balkonynan sekirip ketkendigi, ne bireýdiń qasaqana ıtergeni belgisiz. Shalqar kórermenniń súıikti akteri bolǵan edi dep eske alady onyń qasynda bolǵan áriptesteri. Jas ártistiń qaıtys bolǵanyna bes jyldan beri ýaqyt ótkenmen, onyń artynda qalǵan januıasy teatrǵa tıesili jataqhanada turyp jatyr.

«2012 jyldan bastap jańaǵy teatrdyń basshysy úı alǵansha osy jataqhanada tura berińder degen. Qalaı basshy aýysty, 2016 jyly, solaı meni osy jataqhanany bosat dep qýdalap jatyr. Meniń qazir tórt balam bar. Kóp balaly anamyn», - dedi marqumnyń áıeli Oksana Úrkimbaeva.

Teatr basshysy jastaı jesir qalǵan Oksananyń aıadaı bólmeni bosatýyn talap etip, sotqa bergen. Osy aıda eki sot otyrysy ótken. Jalǵyzbasty ana sotta quqyǵymdy qorǵaıtyn advokat jaldaýǵa da jaǵdaıym  bolǵan joq deıdi. Tórt balamen dalada qańǵyp júrgennen qaraǵanda tar bólmede tura tursam degen jas ananyń armany jelge ushqaly tur.

«Panasyz qalyp, balany ózi qarap, asyraýshysyz qalǵan oǵan óte qıyn. Negizinde teatr úıin berip, sodan keıin baryp qana jańaǵy bólmeni alýy kerek. Eger ony bosat dese úsh balamen qaıda barady?  Teatr oǵan mindetti. Óıtkeni jumys ornyda jubaıy qaıtys boldy», - dedi QR eńbek sińirgen artisi  Qanat Qudaıbergenov.

Jalpy Jambyl men Baızaqov kósheleriniń qıylysyndaǵy bul jataqhana áý basta teatrǵa tıesili bolǵanmen, bólmelerdiń kóbi jekelenip ketken.  Biraq Úrkimbaevtar otbasy bolsa kezinde úı kezegine turyp, páter alamyz degen úmitpen jekeshelendirýge asyqpaǵan. Al Muhtar Áýezov teatrynyń dırektory teatrdyń qazirgi ártisteri de turý kerek deıdi.

«Ózimizdiń qyzmetkerler, úısiz-kúısiz júrgen jastar, otbasylary bar. Solar endi estıdi ǵoı, biledi. Men estidim, ol basqa kúıeýge tıip ketken, odan bala tapqan dep. Sol kezde men oıladym, ol endi Shalqardyń otbasy emes», - dedi M.Áýezov atyndaǵy akademıalyq drama teatrynyń dırektory Erlan Bilálov.

Qońyr daýysymen poezıalyq týynydylardy oryndap, stýdent keziniń ózinde-aq Shekspırdiń «Romeo Djýlettasyndaǵy» basty róldi somdaǵan akterdiń ómiri Roemonyń taǵdyr sekildi qaıǵyly aıaqtaldy. Al onyń artynda qalǵan otbasy 13 sharshy metr tar úıde taǵdyrlaryn qalaı bolatynyn kútip otyr. Sot úkimi teardyń paıdasyna sheshilse, tórt balaly jas ana úsh myń adamnan keıingi  páter kezegi kelgenshe kóship-qonyp júre turmaq.