Qazaqstandyq ǵalym Jumabaı Bákenov qýat únemdeıtin batareıa jasap shyǵardy, dep habarlady 24.kz.

Bul - onyń Nazarbaev Ýnıversıtetinde qolǵa alǵan alǵashqy jobasy. Bul - qalta túbin qaqpaıtyn ári únemdeýde taptyrmas ónim. Qazaqstandyq profesor Jumabaı Bákenovtiń uzaq jylǵy jumysynyń jemisi. Joba Dúnıejúzilik banktiń grantyna ıe bolǵan. Al ǵalymnyń ǵylymı maqalalary Thomson reuters halyqaralyq reıtıńinde úzdik jazbalardyń qatarynda kósh bastap tur.

 «Bul batareıanyń qazirgi ýaqytta qoldanysta júrgenderge qaraǵanda múmkindigi áldeqaıda kóp. Teorıalyq turǵydan alyp qaraǵanda, máselen, qazirgi smartfondardyń batareıasyna qaraǵanda 10 ese artyq jumys isteıdi jáne qýatty uzaq saqtaı alady», - deıdi Nazarbaev Ýnıversıteti ınjenerlik mekteptiń profesory Jumabaı Bákenov.

Uıaly telefondarǵa arnalǵan batareıa bul úlken jobalardyń bastaýy ǵana. Ǵylymı toptyń keleshekte kózdegen kókjıegi bólek. Ǵalymnyń aıtýynsha, ol  Qazaqstanda alǵashqylardyń biri bolyp elektromobıl qurastyrǵan Taır Balabaevpen tyǵyz qarym-qatynasta.  Endi olar kólikterge arnalǵan arnaıy únemdegish batareıa jasamaq. İlki jobadaǵy batareıalar búginde satylymǵa tústi. Kelesi qadam - elektromobılderge arnalǵan batareıa saýdasyn bir izge salý. Biraq ol úshin ónertapqyshtarǵa 3-10 mln dollar kóleminde qarjy qajet. Qyrýar aqshany ǵalymdar ınvestısıalyq konkýrstarǵa qatysyp, utpaq nıette. Ǵylymı topta bul kúni 11 maman eńbektenýde. Olardyń qatarynda Nazarbaev Ýnıversıtetiniń stýdentteri de bar. 

«Bizdiń alǵa qoıǵan maqsatymyz - halyqaralyq deńgeıdegi zertteý ýnıversıteti ataǵyn alý. Qazirgi ýaqytta zerthanalarymyz zamanaýı qurylǵylarmen jaraqtandyrylǵan. Stýdentterdi oqýǵa qabyldaǵannan bastap ǵylymı jumystarǵa tartamyz», - deıdi Nazarbaev Ýnıversıtetiniń prorektory Enn Lonsdeıl.

Qýat únemdeıtin akýmýlátor 2017 jyly EHRO kórmesinde kópshilik nazaryna usynylmaq. Oqý ordasynda bul kúni 140-tan astam joba qolǵa alynǵan. Ǵalymdar Amerıka, Ulybrıtanıa, Avstralıa jáne Qytaıdaǵy áriptesterimen de tyǵyz baılanysta.