Búgin QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan Qazaqstan delegasıasynyń Qytaı Halyq Respýblıkasyndaǵy alǵashqy kezdesýi QHR Sapany qadaǵalaý, ınspeksıa jáne karantın jónindegi bas basqarmasy tóraǵasy Chjı Shýpınmen bolyp ótti dep habarlaıdy qamshy.kz QR ASHM Baspasóz qyzmetine silteme jasap.

Kezdesý barysynda taraptar Qazaqstannyń aýyl sharýashylyǵy ónimderiniń Qytaı naryǵyna kirýi men shekteýlerdi alý máseleleriniń birqataryn talqylady. Atap aıtqanda, Qytaı tarapy QHR-dyń jetkizýshi kompanıalar reestrine engizý úshin a.j. sáýirde qoı etiniń óndirisi júıesin jáne et óńdeýshi kásiporyndardy ınspeksıalaıtynyn rastady. Eki jaq ta Qazaqstannan Qytaıǵa eksporttalatyn 34 ónimge qatysty veterınarlyq jáne fıtosanıtarlyq talaptar Hattamalary jobalaryn kelisimdeý úderisin jyldamdatatyn boldy. Sondaı-aq, Qazaqstan tarapy el aýmaǵynda aýyl sharýashylyǵy ónimderiniń sapasy men qaýipsizdigin baqylaýǵa arnalǵan birikken laboratorıa qurý jáne ony tirkeý bastamasyn kóterdi.

Aıta keteıik, kezdesý qorytyndysy boıynsha kórshiles elge eksporttalatyn bıdaı kebegi partıalaryna qoıylatyn ınspeksıa, karantın jáne sanıtarlyq talaptar týraly Hattamaǵa qol qoıyldy.

Atalǵan kelisimniń arqasynda qazaqstandyq bıznesmender tuńǵysh ret Qytaı naryǵyna bıdaı kebegin eksporttaýǵa qol jetkizdi jáne de bul úrdisti alǵashqylardyń biri bolyp júzege asyrý múmkindigi «HUOERGUOSI IRBIS INTERNATIONAL TRADING CO LTD» kompanıasynyń úlesine tıip otyr.

Óz kezeginde, kompanıanyń bas dırektory Marat Dáýletqalıev osyndaı tıimdi sheshimderdiń astyq eksportyna serpin beretinin ataı otyryp, syndarly kelisim úshin kásipkerler atynan Qazaqstan Úkimetine alǵys bildirdi.

Eske sala keteıik, eki kúndik jumys saparynyń aıasynda QHR Aýyl sharýashylyǵy mınıstrligi, QHR Halyqaralyq saýda-sattyqqa atsalysý komıteti, QHR Komersıa mınıstrligi basshylyǵymen jáne de jergilikti bıznes qaýymdastyǵy ókilderimen kezdesýler ótip, eki eldiń alys-berisi úshin asa mańyzdy birqatar máseleler sheshimin tabady dep kútilýde.