Áıgili orys aqyny, 150-ge jýyq eńbektiń avtory Evgenıı Evtýshenko 85 jasqa qaraǵan shaǵynda AQSH-taǵy aýrýhanalardyń birinde jan tapsyrdy. Bul týraly TASS agenttigi habarlaıdy.

Evgenıı Evtýshenko 18 shildede 85 jasqa tolatyn edi. Ol mereıtoıy qarsańynda Reseı, Belarýs jáne Qazaqstandy aralap gastróldik sapar jasamaq bolǵan. Aqynnyń mereıtoıyna arnap ótkizilmek bolǵan festıváldyń bas prodúseri Sergeı Vınnıkov Evtýshenko ózin Peredelkıno kentindegi Borıs Pasternaktyń beıitiniń qasyna jerleý týraly ósıet qaldyrǵanyn aıtqan.

Evgenıı Evtýshenko 1932 jyldyń 18 shildesinde dúnıege kelgen. Alǵashqy óleńin ol 1949 jyly jarıalady. Al úsh jyl ótkennen keıin "Razvedchıkı grádýshego" degen atpen alǵashqy kitaby shyqty. 1991 jyldan beri ol AQSH-ta ómir súrip kelgen.

Aıta keteıik, 31 naýryzda Evtýshenkonyń AQSH-ta aýrýhanaǵa aýyr halde túskeni habarlanǵan.

2015 jyly Evtýshenkonyń júregine operasıa jasalyp, kardıostımýlátor ornatylǵan. Oǵan deıin 2013 jyly dárigerler aqynnyń oń aıaǵyn kesken edi.

Evgenıı Evtýshenko – ataqty orys aqyny, KSRO memlekettik syılyǵynyi laýreaty. Ispanıa men Amerıkanyń óner shyǵarmashylyq akademıasynyń qurmetti múshesi. Pıtsbýrg ýnıversıteti men Santa-Domıngo ýnıversıtetteriniń profesory bolǵan. Kóptegen óleńder men prozalyq jınaqtardyń, kınosenarıılerdiń avtory. Onyń týyndylary álemniń jetpisten asa tiline aýdarylǵan.