Stokgolmde 1 sáýirdiń keshki ýaqytynda amerıkalyq aqyn ári mýzykant Bob Dılanǵa Nobel syılyǵy tapsyryldy. Nobel syılyǵymen qosa altyn medal tabystaldy. Mýzykanttyń qalaýy boıynsha marapattaý rásimi BAQ ókilderinsiz tek kameraǵa túsirý arqyly ótken, dep habarlaıdy TASS.

Osy syılyqtyń $909 myń aqshalaı júldesin alý úshin Bob Dılan Nobel ıegeriniń dástúrli dárisin bıylǵy maýsymnyń 10-ynan keshiktirmeı oqýy tıis.

Nobel syılyǵyn tapsyrý rásimine qatysyp shyqqannan keıin senbi kúni keshke Dılan Stokgolmde óner kórsetken. Buǵan deıin mýzykant eýropalyq týryn sáýirdiń 1-i men 2-i kúnderi Shvesıa astanasyndaǵy konserttik qoıylymdarmen bastaıtyny habarlanǵan edi.

Ótken jyly Shved akademıasy ádebıet boıynsha 2016 jylǵy Nobel syılyǵyn Bob Dılanǵa «amerıkalyq uly án dástúrinde jańa poetıkalyq tirkester týdyrǵany úshin» bergen. Alaıda, Dılan belgili bir sebeptermen byltyr jeltoqsannyń 10-y kúni Nobel syılyǵy ıegerlerin resmı marapattaý rásimine kelmeı qalǵan edi.