Qaraǵandy oblysyna qarasty Qarqaraly aýdanyndaǵy Núrken Ábdirov aýylynyń aǵaıyndy jigitteri Qopa ózenine batyp ketkeni týraly aqparat shyqqan bolatyn. Jylqy izdep shyqqan eki jigittiń biri sýǵa ketken, ony qutqaramyn dep jantalasqan aǵasy da aǵysqa qarsy kele almaǵan. Al úshinshi jigit ózenniń arǵy betinen óte almaı qalǵan bolatyn. Oqıǵa ornyna jedel jetken qutqarýshylar ony tańǵy 04:00 shamasynda aýylǵa qaıtardy,-dep habarlaıdy "Qasym-Aqparat" portaly.
Qarqaraly aýdanynyń ákimi Halel Maqsutovtyń aıtýynsha, sýǵa ketken azamattar qaýipsizdik erejesin óreskel buzǵan. Qaıǵyly oqıǵa bolardan buryn olarǵa aýyldyń ýchaskelik polısıa qyzmetkeri jolyǵyp, sý tasqyny qaýpi tónip turǵanyna baılanysty mal izdeýge shyǵýǵa bolmaıtyndyǵyn jetkizgen. Aǵaıyndy jigitter onyń aıtqanymen kelisedi. Alaıda polısıa qyzmetkeri syrt aınalǵanda atqa minip, jylqy izdeýge ketken. Ózderiniń jergilikti jerdiń jaǵdaıyn jaqsy biletindigine tym senimdi bolǵan azamattar qaýip-qater týraly eskertýlerdi eleýsiz qaldyrady.
Qutqarýshylardyń kómegimen aýylǵa jetkizilgen azamat Suńǵat Kópbalın óziniń qaýipsiz jerge shyǵarylýy men aǵaıyndy jigitterdiń ólimi týraly tolyq baıandap berdi.
«Darhan men onyń aǵasy Saıran dál meniń kóz aldymda sýǵa ketti. Biz tańerteńgilik Darhan ekeýmiz jylqy izdeýge shyqqan bolatynbyz. Ol kezde sýdyń deńgeıi aıtarlyqtaı bıik bolǵan joq. Al biz aýylǵa qaıtyp kele jatqanda sý kóterilip ketti. Keı jerlerde onyń deńgeıi 2-2,5 metrge deıin jetti. Biz óz betimizben ózennen óte almasymyzdy túsindik te aýyldan kómek shaqyrdyq. Darhannyń aǵasy Saıran men taǵy birneshe aýyldas jigitter bizge kómektesýge keldi. Olar óz kúshterimen jaǵaǵa shyǵarýǵa tyrysty. Sýǵa birinshi bolyp Saıran túsken bolatyn. Qatty aǵys ony aǵyzyp áketti, artynan inisin qutqaramyn dep aǵasy da sýǵa ketti. Osydan soń sýǵa túsýge jigitterdiń eshbiriniń júregi daýalamady. Sondyqtan qaladan keletin kómekti kútýge týra keldi», – deıdi Suńǵat.
Qutqarýshylardyń aıtýynsha, qaza tapqan jigitterdiń úlkeniniń jasy 44-te, kishisi 36 jasta eken. Darhannyń sońynda úsh balasy al Saırannyń eki balasy qalypty. Olardyń denesi áli tabylǵan joq. Qazir izdestirý-qutqarý sharalary jalǵasýda.
