Qazaqstan prezıdenti Nazarbaev Ázerbaıjanǵa memlekettik sapary aıasynda Bakýde prezıdent Álıevpen kezdesti dep habarlaıdy Qamshy.kz Aqordanyń baspasóz qyzmetine silteme jasap.
Qazaqstan Prezıdenti Ázerbaıjannyń azattyǵy men aýmaqtyq tutastyǵy jolynda qaza tapqan batyr perzentteri jerlengen Shahıtter aleıasyndaǵy máńgilik alaýǵa gúl shoǵyn qoıdy.
Sondaı-aq, Memleket basshysy Ázerbaıjannyń jalpyulttyq kóshbasshysy Geıdar Álıev pen onyń zaıyby Zarıfa Álıevanyń beıitine gúl shoǵyn qoıdy.
Memleketter basshylary resmı kezdesý rásiminen soń «Zagýlba» rezıdensıasynda shaǵyn qurammen kelissóz júrgizdi.
Kezdesý barysynda saıası, saýda-ekonomıkalyq jáne mádenı-gýmanıtarlyq yntymaqtastyqtyń damý ahýaly men perspektıvalary, sondaı-aq kún tártibindegi halyqaralyq jáne óńirlik ózekti máseleler talqylandy.
Nursultan Nazarbaev Qazaqstan men Ázerbaıjan arasynda ejelden tarıhı jáne mádenı baılanystarǵa negizdelgen dástúrli dostyq sıpatyndaǵy ekijaqty qarym-qatynas qalyptasqanyn atap ótti.
Memleket basshysy álemdik ekonomıkadaǵy qazirgi kezdegi jańa úrdister eki el seriktestigin odan ári damytýǵa tyń serpin bere alatynyn aıtty.
– Álemdegi daǵdarystyq qubylystar ulttyq ekonomıkamyzǵa aıtarlyqtaı zalalyn tıgizip jatqanyn kórip otyrmyz. Sonymen qatar, bul birlesken jańa óndirister ashyp, jasyryn múmkindikterimizdi paıdalanýǵa jol ashýda. Ekonomıkany ártaraptandyryp, ınovasıalyq tehnologıalarǵa nazar aýdarý qajet, – dedi Qazaqstan Prezıdenti.
Nursultan Nazarbaev ekijaqty yntymaqtastyqtyń barlyq salasynda ózara is-qımyldy údetý, sonyń ishinde Qazaqstan men Ázerbaıjannyń kólik-tranzıt áleýetin damytý qajettigin atap ótti.
– Bul kezdesý elderimizdiń ózara is-qımylyn odan ári tyǵyz damytýǵa múmkindik týǵyzatyn jańa formattaǵy qarym-qatynasymyzǵa tyń serpin berýge tıis, – dedi Memleket basshysy.
Sondaı-aq, Qazaqstan Prezıdenti eki memlekettiń halyqaralyq saladaǵy ózara túsinistigine jáne ustanymdarynyń uqsastyǵyna nazar aýdardy. Budan bólek, Nursultan Nazarbaev I.Álıevti 2016 jylǵy referendýmda Ázerbaıjan halqynyń el konstıtýsıasyna engiziletin, prezıdenttiń ókilettik merzimin uzartýǵa baǵyttalǵan ózgeristerdi qoldaǵanymen quttyqtady.
I.Álıev yntymaqtastyqty odan ári nyǵaıtyp, onyń aıasyn keńeıtý jolynda Qazaqstan Prezıdentiniń sapary mańyzdy ekenin aıtty.
– Búgin qol qoıylǵaly otyrǵan qujattar ekijaqty qarym-qatynasty ári qaraı nyǵaıtýǵa septigin tıgizetinine senimdimin. Qazaqstan biz úshin dostas, baýyrlas el bolyp sanalady. Biz búgingi kezdesýge zor mán berip otyrmyz, – dedi I.Álıev.
Sonymen birge, Ázerbaıjan Prezıdenti Ilham Álıev Qazaqstannyń Nursultan Nazarbaevtyń basshylyǵymen jetken jetistikterin atap ótti.
