Ońtústik Qazaqstan oblysynda nóser jaýyn men taýdaǵy erigen qar sýynyń saldarynan Arys ózenindegi sý deńgeıi kúrt kóterilgen. Qyzyl sý kópir erneýindegi beton plıtalardy shaıyp, «Batys Eýropa – Batys Qytaı» kólik dáliziniń birneshe jerin zaqymdady. «Qaýip kúsheıgendikten, kúre joldyń Ordabasy aýdanyndaǵy tusy jabylyp, kólikter aınalma jolmen júrip jatyr» dep habarlaıdy tótenshe jaǵdaı qyzmetkerleri. Bul týraly  «Qamshy» portaly otyrar.kz-ke silteme jasap habarlaıdy.

Mamandardyń aıtýynsha, halyqaralyq kólik dálizindegi kópir áli resmı qabyldanbaǵan. Kúni keshegi jaýynnan Boraldaı ózenindegi sý deńgeıi birden 40 santımetrge kóterilgen. Sol sý endi Arys ózeni arqyly aǵyp jatyr. 15 ózen kelip quıatyn Arystyń boıynda táýlik boıy kezekshilik uıymdastyrylyp, qaýipti degen jaǵalaýlar shegendelip jatyr. «Eldi mekenderge qaýip joq» deıdi mamandar.

Qazirgi tańda tótenshe jaǵdaı departamentiniń mamandary arnasy burylǵan ózenderdiń eldimekenderdi shaıyp ketpeýin qadaǵalap otyr. Osy maqsatta Arys ózeni saǵasyndaǵy Temirlan eldimekeni mańyndaǵy damba nyǵaıtyldy. Jergilikti ákimdiktiń uıymdastyrýymen jáne órt sóndirýshilerdiń kómegimen jaǵalaýǵa qum-topyraq toltyrylǵan 3000 qap tastalyp, 150 metr jaǵalaý nyǵaıtyldy.