"Buryndary eldiń jyldyq búdjetin bekiterde, tún uıyqtamaı, kún uıyqtamaı, daýlasyp, árbir tıyndy sanap-eseptep-ekshep, aqsha bólinetin salany-mekemeni ábden zerttep, daýlasyp, qyryq-pyshaq bolýshy edik. Keıingi kezderi "Búdjet týraly" zańdy birden qabyldaı salatyn boldy. Joǵarydan túsken buıryq sondaı. Nege bulaı deýge eshkimde ne jiger, ne qaýqar joq. Sodan, mundaı nársege shydamaı depýtattyqtan óz erkimmen bas tartyp, ketip qaldym", - dep edi belgili qarjyger azamat. Qyryq jyl boıy elimizdiń qarjy salasyn basqarǵan úlken kisi tekten tekke kúıinbeıtini anyq qoı. Bıliktegi dókeıler nebir qarjylyq qıturqy operasıalardy "shyrǵalań oıynǵa" aınaldyryp alǵaly qashan.

"Mega", "Han shatyr", "Eýrazıa" taǵy da basqa alyp oıyn-saýyq ortalyqtarynda bir býtıktyń bir aılyq arendasy - birneshe mıllıonnan bastalyp, adam óte bermeıtin jerdegi 3-4 sharshy metrlik qýys bólmeler eń azy - 300 myńnan tóleıdi. Odan bólek bıznesmenderdiń salyǵyn, komýnaldyq qyzmet aqysyna ketetin aqshalaryn esepteı berińiz. Tipti "Eýrazıa" saýda ortalyǵynda saýdagerlerdi kádimgideı qanaıtyn kórinedi. 5 mınýtqa keshigip qalsań da aqsha, bólme ishinde tıtteı shań tursa da aıyppul tóleısiń, býtık ishindegi biz zat óz ornynda turmasa da aqsha berip áreń qutylady ekensiń. Kásipkerler bir jerge aryzdanyp barýǵa dáti joq. Bosqa tyrashtanyp ne kerek, aryzdary eskerýsiz qalatynyn áý bastan bilip alǵan. Sebebi, sebebi - ol jerdiń ıesi áıgili Mamınder. Osy sıaqty alyp oıyn-saýyq ortalyqtarynyń ıelerin anyqtaı tússeńiz, ar jaǵynan bıliktegi ataqty adamdardyń famılıalary atyp shyǵady. Aıtpaǵym,sondaı iri ortalyqtarǵa búdjetten ne úshin aqsha bólinip kelgen? Bir aıda bir ǵana býtıkten mıllıondap alyp otyrǵan bolsa, bir aıda sandaǵan býtıkten mıllıardtaǵan qarjy jınalmaı ma? Qarjyǵa zárý qanshama áleýmettik salalar bar? Sol aqshaǵa MEGA mıllıarderleriniń "bıznestiń áleýmettik jaýapkershiligi " aıasynda jasaǵan bir myqty qamqorlyqtaryn kórmeppin. Bizdiń, salyq tóleýshilerdiń aqshasyna qol jaıatyndaı músápir kúıge túskenderine jol bolsyn... Zańsyz bólingen qarjy búdjetke qaıtarylýy tıis! Quzyrly oryndar tekserý júrgizýi tıis! Áı qaıdam, osy kezge deıin búdjettiń árbir tıynyn shyn janashyrlyqpen sanap, izdeý salatyn, maqsatty-maqsatsyz bólingen qarjyny baqylap otyrǵan bir adamdy kórgen joqpyn. Buǵan - bizdiń qarjygerler de, ekonomıser de, tipti ózimiz de tikeleı kinálimiz. Óıtkeni - talap etýdi bilmeımiz!!!

Dına Túlekova.