Tanys bala

Qarǵam-aý, senbe ediń bul tanys bala, 

Sen endi, tanys bala alystama .

Men seni tanydym ǵoı, tanyp turmyn,

Sen meni tanydyń ba, anyq qara.

Tanys qoı qylyǵyń da, burymyń da,

Tanys-aý belderiń de, ıyǵyń da.

Baıaǵy kúlkiń ǵana kórinbeıdi,

Uıalap turatuǵyn mıyǵyńda.

Túskende qyz qýardyń joryǵyna,

Qamshyńdy batyratyn jonymyzǵa.

Jyltyr qara mashına minipp apsyń,

Baıaǵy qara kerdiń orynyna.

Boz bala az emes-ti saǵan ergen,

Sonda baǵym ozyp ed(i) tamam elden,

Qara kerdi sypyryp otqa qoıyp,

Qoltyqtasyp asýshy ek ana belden.

Jaman aǵań araqqa qyzyp alǵan,

(Baııdy dep bul kúnde qyzy bar jan)

Seni alysqa zorlyqpen uzatty da,

Qara kerdi soǵymǵa jyǵyp alǵan.

Sodan keıin bul jaqqa kettiń kelmeı,

Mende talaı saǵynysh keshtim kóldeı.

Kópke deıin eleńdep júretinmin,

Qara kerdiń dúbyry estilgendeı.

Seni solaı alysqa attandyrdym,

(Baǵyń jansyn álide maqpal qurbym)

Sezip turmyn elesi ótken kúnniń,

Kóz aldyńda shubyryp jatqandyǵyn.

Samarqannyń saǵynyshy

Almaty. Kóktem alǵashqy,

Oraldy qustar naz aıtyp .

Aq jaýyn kúnde jalǵasty,

Jer álemdi kil tazartyp.

Tirlikke tolǵan balaǵy,

Munartyp jatyr taý basy.

Abyrda-sabyr baıaǵy,

QazUÝ-dyń keń aýlasy.

Qıalmen álem kezgen bop,

Sabaqty oqyp jarytpaı.

Men júrmin áıteý meń-zeń bop,

Basyna urǵan balyqtaı.

Usynsam qolym jetpeıtin,

Jer menen kókteı aramyz.

Esimnen bir sát ketpeısiń,

Alysta qalǵan bala qyz.

Sezdirip syryn súıgenniń,

Ketip eń salyp sanamyz.

Maǵan myń batpan muń boldyń,

Barmaqtaı ǵana bala qyz.

Ózińnen basqa uqpaıdy el,

Qyzyqqa toly keshteri.

Men alǵash baqyt qushqan jer,

Aýyldyń orta mektebi.

Kún edi-aý ol bir mándi ótken,

Bılegen, kúlgen, ándetken.

Birine-biri saı kelgen,

Balapan sezim bal kóktem.

Júrektiń otyn jandyrǵan,

Sezimniń syryn qalqyp ap.

Turýshy eń tosyp aldymnan,

Janaryń kúndeı jarqyrap.

Tolqytqan sezim keýdeni,

Sol kúnder qandaı eńseli.

Tuǵyrym deýshi eń sen meni,

Tunyǵym deýshi em men seni.

Ótipti-aý ómir mańyzdy,

Kóńilge kún de gúl egip.

Atyzda júrip ańyzǵa,

Aınalǵan ǵashyq biz edik.

Seni de qaıǵy meńdetip,

Bir jerden shyqpaı oıymyz.

Almaty jaqqa men ketip,

Tarqaǵan solaı toıymyz.

Erjetken ortań ózińniń,

Barlyǵy bar ǵoı osy elde.

Aldynda júr dep kózimniń,

Qoımady ákeń keterde.

Men kettim keýdem bos qaldy,

Sen qaldyń maǵan jaýtańdap.

Ýaqyt bizdiń jospardy,

Talqandap ketti, talqandap.

Perishtem be diń sen meniń,

Tóbemnen qudaı túsirgen.

Muń toly qara kózderiń,

Shyqpaı-aq qoıdy túsimnen.

Jaıaýlasam da jetermin,

Ǵashyqqa qashan jer alys.

Jyndanyp keter me ekenmin,

Kelgenshe jazdyq demalys.

Hattarym meniń alyp ush,

Júrekke atqan jebedeı.

Sanaǵa tunǵan saǵynysh,

Telegeı edi telegeı.

Kim boljap bilgen ómirdi,

Ýaqyt aıtar bıligin.

Kóktemiń ótsin kóńildi,

Kózimnen ushqan bulbulym.

Arman qyz

Arman qyz qaıda kettiń adastyryp,

Men júrmin baqsylarǵa bal ashtyryp.

İzdedim ınternettiń ıleýinen,

Kafesinde ınternet tań atqyzyp.

Seni izdep dalaǵa ushtym, qalaǵa ushtym,

İzdedim baǵdarynan bar aǵystyń.

İzdedim tamshysynan jaz jaýynnyń,

İzdedim yzǵarynan qara qystyń.

Men senem áıteý seni tabaryma,

Qaraımyn, bar arnanyń habaryna.

Shyraılym ózińdi izdep tapqanymsha,

Shydaımyn, shyryldatqan talaı muńǵa.

Seni izdep aıdy aýnattym, jyldy aýnattym,

Shar basyma telegeı muń qaınattym.

Kóktem saıyn jınadym saǵan arnap,

Eń ádemi gúlderin qyzǵaldaqtyń.

Taýsylmas saǵynyshtan enshi aldyrǵan,

Suraýdy bilmesem de qaı taǵdyrdan.

Men senem áıteý maǵan bir kúnderi,

Kezigip qalaryńa qarsy aldymnan.

***                       ***                         ***

Kóńildi aılanyp júr shaǵala muń,

Nesine qarǵam meni aǵaladyń?

Kózińmen kúlimdegen aldaı bermeı,

Bizdiń de syrdyń boıyn jaǵalaǵyn.

Men saǵan olaı qarap bulaı qarap,

Júrmin-aý kózimmenen qur aımalap.

Sen meni túsinetin sıaqtysyń,

Ózińsiz kóńilimdi kim aýlamaq.

Qaı taǵdyr meni saǵan eliktirgen,

Qasyńa barǵym keler jelip birden.

Jeksuryn, jer jastanǵyr jalǵyzdyqtan.

Qaraǵym shynymenen zeriktim men.

Saǵynyp, sarǵaıysyp kórisetin,

Sharabyn shattyǵyńnyń bóle ishetin.

Tiri adamǵa, bir adam kerek eken,

Qaıǵy men qýanyshyn bólisetin.

Men seni asylym dep baǵaladym,

Jamanǵa jan aǵańdy balamaǵyn.

Kel meniń daýysyma daýysyń qos,

Jastyqtyń jalǵyz soqpaı barabanyn.

***                        ***                             ***

Saǵyndyń ba dediń aý janym maǵan,

Ǵashyq - ǵashyq bolama saǵynbaǵan.

Saǵan degen táp-tátti saǵynyshtyń,

Kúnim barma kórpesin jamylmaǵan.

Nazarymnyń ózińe buryp bárin,

Saǵyntty ǵoı nazdaryń, qylyqtaryń.

Sumbyl qara shashyńnyń árbir talyn,

Umytpadym qaraǵym, umytpadym.

Kúndi ótkerip saǵynyp, túndi ótkerip,

Qıal shirkin jatty ǵoı, túıdektelip.

Saǵan usha jazdaımyn keı shaqtarda,

Ándi teńdep, janyma jyr bókterip.

Aqtarylyp aldynan aq tilegi,

Saǵynyshyń  áldılep jatty meni.

Qarǵam meniń, saǵynysh sıaqty ǵoı,

Mahabbattyń teńdessiz tatty jeri.

***                       ***                            ***

Eger meni ras bolsa súıgeniń,

Saǵynyp júr kezdessek te kúnde myń.

Men qýansam tańym kúlip atqanda,

Menen buryn at bórikińdi aspanǵa.

Men jylasam, sende jylap ishińnen,

Súrt jasymdy óziń bergen shytyńmen.

Men jol tappaı qarańǵyda kidirsem,

Júregińdi alaý qylyp júgir sen.

Qaıǵy bolyp qar boratsa qys maǵan,

Kóktem bolyp gúlińdi alyp ush maǵan.

Bireý meni tastasa otqa ıterip, 

Óziń qutqar qanatyńmen sý seýip.

Taba almasam shabytymdy mazdaǵan,

Jyrym bolyp oral maǵan jazbaǵan.

Kórinbesem jetem degen kómbeden,

Súıgen bolsań úmit úzbe sen menen.

Asar bolsam, asýdan jan aspaǵan,

Tilegińdi shashý etip shash maǵan.

Sonda ǵana men izdegen jar sensiń.

Daıyndaǵan: Erlan Tóleýbaı