«Eń alǵashqy mahabbat bastalady mektepten» demekshi mektep qabyrǵasynda júrgen shaqtarda árqaısymyz mahabbat sezimderin bastan keshtik. Jaı ǵana mahabbat emes, alǵashqy mahabbat, umytylmas mahabbat, júrekte máńgi ornaıtyn mahabbat. Tipti, basqa janmen otaý qursań da, alǵashqy mahabbatty umytý múmkin bolmas. Al, mektep qabyrǵasynda júregińnen oryn alyp úlgergen adammen kóńil qosyp, shańyraq qurǵandar álemdegi eń baqytty jandar shyǵar, bálkim. Meniń de jazbaq bolǵan keıipkerlerim dál sondaı jandar. Tek ol ekeýi mektep bitire sala emes, araǵa 60 jyl salyp, bir-birin izdep tapqan, bir jastyqta qartaıyp, kóz jumýǵa sol kezdiń ózinde bel baılaǵan jandar. Baqyttyń erte-keshi joq degen osy shyǵar.
Djım men Djoıs XX ǵasyrdyń ortasynda mektep oqýshylary edi. Bastaýysh synyptyń ózinde qyz ben jigit bir-birinen aıyrylmastaı boldy. Al, eseıip, mektep bitirýge taıaǵanda bala kóńilderi úlken sezimge ulasty. Alaıda, mektep bitire sala ekeýniniń joldary ekige aıyryldy. Qoshtasý keshinde birge bılegen bıleri eń sońǵy boldy dep olar oılamaǵan. Qandaı jaǵdaıda aıyrylysqany bizge belgisiz.
Jergilikti BAQ-tyń habarlaýysha, Djım men Djoıs eki túrli memlekette turdy, jumysqa ornalasyp, kareraralaryn jasady. Otaý quryp, ekeýi eki túrli álemde baqytty kún keshti.
Búginde eki ǵashyqtyń ómirlik serikteri kóz jumǵan. Taǵdyr ekeýin kezdestirý úshin mańdaılaryna ádeıi jazyp qoıǵandaı. Sebebi, ekeýin úlken tosynsyı kútip tur edi.
Kúnderdiń birinde mektep kezderin eske túsirmek bolǵan Djım álbomdardy aqtara bastaıdy. Árıne, sýretterden bala kezdegi ǵashyǵy Djoısty kóredi. Júregi alasurǵan er adam Djoısty áleýmettik jelilerden izdeı bastaıdy. İzdeýi sátti aıaqtalyp, bala ǵashyqtar áleýmettik jelide jolyǵady. Eshteńe ózgermegen sekildi, bári sol baıaǵysha, júrektegi sezim de, kóńildegi tolqý da... Eresek er men áıel kún saıyn birneshe saǵattap telefonmen sóılesýge kóshedi, aqyry kezedsýge bel baılaıdy.
Mektep bitirgenderine 64 jyl ótken soń Djım men Djoıs bala kúnderindegi armandaryn oryndaıdy – 81 jastaǵy ǵashyqtar toı jasaıdy. Jubaılardyń balalary men nemereleri ata-ájeleriniń sheshimin qýana qabyldap, qoldaý kórsetti. Sebebi, olar úshin atasy men ájesniń baqytty kúıde dúnıeden ótkeni mańyzdy edi.
Aýdarǵan: Gúlim JAQAN
