"Túrikshildik" degennen — Batys nege qorqady?
"Túrikshildik" degennen — Shyǵys nege qorqady?
"Túrikshildik"- sanada, Kókbóri bop jortady,
Kók Túrik bop jortqan soń — olar úshin sor taǵy.

Uıqtap ketken bir kezde oıatatyn alypty,
Biriktirip alatyn túrik tildes halyqty,
Sonda da olar bul sózdi qaýipti dep taýypty,
"Túrikshildik" degeniń — olar úshin qaýipti!

Jaı otyndaı jarqyldap tasyp turǵan jigeri,
Kırdyń basyn kesip ap Syr boıynda júr edi.
Qyz da bolsa jalynnan jaratylǵan júregi,
"Túrikshildik" degendi – Tomırıs dep biledi.

Qara kóktiń tuqymy jaratylǵan Tektiden,
Sarbazdary shetinen janyp turǵan ot kileń!
QaHarynan yǵatyn alys-jaqyn, shet kileń,
"Túrikshildik" degendi — Móde qaǵan dep biler.

Batystyqtar ústinde bir ot qamshy oınaıdy,
Saýyt-saıman ústinde kórgen adam toımaıdy!
Qalyń ásker shubyryp Reındy boılaıdy,
"Túrikshildik" degendi — Atılla dep oılaıdy.

Jaýlap alǵan bir kezde alys, alys syrt elin,
Sýyt júrgen joryqta kileń erler bir tegin.
Tarıhymdy nesine búrkemelep, irkemin,
"Túrikshildik" degendi — dep oılady Kúltegin.

Býmyn qaǵan, Estemı, Bilge qaǵan taǵy bar,
Kók Túriktiń erleri saptan taǵy tabylar.
Tulparynyń astynda — Batys, Shyǵys jalynar,
"Túrikshildik" degeniń bulardan da tabylar.

Qansha ǵasyr myzǵymaı Shyn taǵyna qonatyn,
Qyraǵy kóz qyrandaı qıyrlardy sholatyn,
Sary ózennen sýarar astyndaǵy toq atyn,
Qubylaıdyń qanynda Túrik qany bolatyn…

Balasaǵunı, Qashqarı – ǵulamasy Túriktiń,
Ókilderi bolatyn Túrik degen uly ulttyń!
Shýaǵymen solardyń men ózimdi jylyttym,
Bilimimen solardyń Túrik bolyp biriktim!

Úndi jerin ultyna Otan etip tańdady,
Júzege asty osynda Babyr…JıHan armany…
Júrip turǵan olardyń eki jaqqa zańdary,
Ol da Túrik bolatyn — Uly Moǵol handary.

Túrik bolyp týǵanmen ómir boıy bir júrmes,
Tarıhty bilmeıtin — shyn máninde dym bilmes!
Aryq qazǵan armannan dalalarǵa sý júrmes,
Mysyr elin bılegen Beıbarysty kim bilmes!

Bárinen de asyp tur Túrikterdiń sáýleti,
Bárinen de asyp tur Túrikterdiń dáýleti!
Aıta bersem shejire — tarıhtyń ár beti,
Jarty álemdi bılegen — Osmanǵazy áýleti.

Qoja Ahmet Iasaýı — bar Túriktiń besigi,
Osy adammen tanylǵan Sýfızmniń esimi.
Aıtty, bitti, bolady! — Er Túriktiń kesimi,
Bar Túrikke ashyq tur — Túrkistannyń esigi!

"Túrikshildik" negizin - qalaǵandar kim deseń?
Onda tizip aıtaıyn esimderin bilmeseń:
Eń birinshi — Aqshora, Atsyz jáne Gókalyp,
Gaspyraly, Shoqaılar — Er Túrikke kún kósem!

"Túrikshildik" - óleńniń qaı jaǵynan baı uly,
Uly Maǵjan bir ózi — bar Túriktiń shaıyry!
"Túrikshildik" bolady — úmitimniń qaıyǵy,
Dál osynda jatqandaı — bar nárseniń baıyby.

Kók Túriktiń kókpeńbek aspan tústes baıraǵy,
Kók baıraqty kórgende eske túser qaıdaǵy!
Qansha myń jyl ótkende qaıta túlep, jaınady,
Kók Túriktiń besigi – Uly Dala aımaǵy!

Búkil dalam qaıtadan ot tıgendeı dúrkirer,
Uıyqtap ketken er halyq qaıtadan bir silkiner!
Barsha Túrik toı jasap, qaıtadan bir tyń túler,
Túptiń túbi kóp Túrik — osy jerge tý tiger!!!


Jumash Kenebaı,
(Sonaý 2003 j. jazylyp, 04.05.2017 j. qaıta óńdeldi)