«Ordabasy» fýtbol klýby 500 mln. teńgege satyldy. Elektrondy úlgide júrgizilgen saýdaǵa salynǵan klýbty alýǵa 3 birdeı úmitker yqylas bildirgen. Olardyń qatarynda «BIIK» Sport servıs», «Namys» sport ortalyqtary jáne jeke tulǵa bar. Bastapqy baǵa 248 mln. bolyp belgilengen, dep habarlaıdy Qamshy.kz aqparat agenttigi kk.tvk-uko.kz saıtyna silteme jasap.

Halyq arasynda eki jyl boıy júrgen qaýeset aqyry shyndyqqa aınaldy - Qazaqstannyń premer-lıgasynda oınaıtyn jalǵyz fýtbol klýby ońtústikqazaqstandyq «Ordabasy» jekeshelendirildi.

«Ordabasy» kásibı fýtbol klýby» aksıonerlik qoǵamynyń satylýy jónindegi aqparat buǵan deıin gosreestr.kz memlekettik múlik reestri saıtynda paıda boldy. Bastapqy baǵa 248 mln. teńge kóleminde belgilengen. «Ordabasylyqtardy» ıelený quqyǵy úshin úsh kandıdat, atap aıtqanda, «BIIK» Sport servıs», «Namys» sport ortalyǵy jáne jeke tulǵa talasty. Olardyń qaısysy rekordty 502 mln. teńgeni tólegendigin oblystyq Qarjy basqarmasy naqtylamady.  

«Búgin tender ótti. - Satyp alýshy kim boldy? - Bul aqparatty basshylyqpen kelisý kerek. - Iaǵnı bul aqparat jarıa etilmeıdi ǵoı? - Iá, ázirge kelisimshart jasasqanymyz joq. Ol áli de bas tartýy múmkin»,- dep málim etti OQO Qarjy basqarmasynyń mamany. 

«Ordabasy» fýtbol klýby 1998 jyly «Tomırıs» ataýymen qurylǵan bolatyn. 2003 jyly qazirgi ataýyna ıe boldy. Qazaqstannyń jalpy týrnırlik kestesinde úshinshi orynda ornalasýda.