Búgin, 29 tamyz kúni QR Din isteri jáne azamattyq qoǵam mınıstrliginde Din jáne azamattyq qoǵam salasyndaǵy Qoǵamdyq keńestiń otyrysy ótti dep habarlaıdy Qamshy.kz aqparat agenttigi.

Keńeske qatysýshylar «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Zań jobasyn talqylady.

İs-sharaǵa QR Din isteri jáne azamattyq qoǵam mınıstri Nurlan Ermekbaev, Din jáne azamattyq qoǵam salasyndaǵy qoǵamdyq keńestiń tóraǵasy Tóleýtaı Súleımenov, qoǵamdyq keńes músheleri, ÚEU, dinı birlestikter, jastar uıymdarynyń ókilderi qatysty.

Atalǵan taqyryp boıynsha Din isteri komıteti tóraǵasynyń mindetin atqarýshy Erkin Ońǵarbaev baıandama jasady.

«Zań jobasyn daıyndaý barysynda memlekettik organdar, qoǵamdyq birlestikter, sarapshylar qaýymdastyǵy ókilderiniń jáne  azamattardyń usynystary men oılary barynsha eskerildi.               Jańa normalardy engizý barysynda halyqaralyq tájirıbege basa nazar aýdaryldy», – dep atap ótti óz sózinde Din isteri komıteti tóraǵasynyń mindetin atqarýshy Erkin Ońǵarbaev.

Zań jobasyna Qazaqstan azamattarynyń shetelderde dinı bilim alýyn retteıtin jańa norma engizilgen. Osynyń negizinde endi elimizdiń azamattary Qazaqstanda joǵary oqý oryndaryn aıaqtaǵannan keıin ǵana shetelde dinı bilim ala alady. Túrkıa jáne Malaızıa elderiniń tájirıbesine súıensek, bul elderdiń azamattary shet memleketterde dinı bilim alý úshin eń aldymen óz otandarynda joǵary bilim alýlary shart.

Zań jobasyna engizilip otyrǵan taǵy bir jańashyldyq ol – kámelet jasyna tolmaǵan jasóspirimderdi ata-anasynyń ruqsatynsyz qulshylyq etýge, dinı rásimderdi oryndaýǵa qatystyrmaý. Mundaı normalar Ózbekstan men Tájikstan elderiniń zańnamalarynda bekitilgen.

Sondaı-aq, qoǵamdaǵy turaqtylyqty qamtamasyz etý maqsatynda adamnyń bet-beınesin tumshalaıtyn kıim nysandaryn qoǵamdyq jerlerde kıýge tyıym salý kózdelip otyr (nıkab, chadra, parandja, balaklava, maska). Máselen Belgıa, Fransıa, Nıderlandy, Bolgarıa memleketteri adamnyń bet-beınesin tumshalaıtyn kıim nysandaryna shekteý qoıý barysynda halyqaralyq tájirıbege súıengen. 

Shara sońynda keńes músheleri ózara pikir almasyp, óz oılaryn bildirdi. Atap aıtqanda, din salasy, azamattyq qoǵammen qarym-qatynas jáne jastar saıasatyn júzege asyrý salalarynda jumystardy jetildirý jónindegi usynystaryn ortaǵa saldy.