Búgin Almatydaǵy Jazýshylar odaǵy basqarmasynyń Ádebıetshiler úıinde jazýshy, dramatýrg, Qazaqstannyń Eńbek Eri Dýlat Isabekovti aqtyq saparǵa shyǵaryp salý rásimi ótti. 

Aldymen Qazaqstan Jazýshylar odaǵynyń basqarma tóraǵasy Mereke Qulkenov sóz sóılep, rásimdi ashyp berdi.  

Jıynda 

Memlekettik hatshy Erlan Qarın Prezıdent Qasym-Jomart Toqaevtyń kóńil aıtý hatyn oqydy.

«Dýlat Isabekuly ulaǵatty ǵumyryn ult ádebıetine arnaǵan, taǵylymdy týyndylarymen oqyrman sanasyna shamshyraq bola bilgen naǵyz degdar tulǵa edi. Halqymyzdyń rýhanı álemin baıytýda, ulttyq prozamyzdyń kókjıegin keńeıtýde aıanbaı ter tógip, ónegeli ómir súrdi. Qýatty qalamynan týǵan súbeli shyǵarmalary, dramalyq eńbekteri álem sahnalaryn baǵyndyryp, dúnıe júzine kıeli sóz ónerimizdi dáriptedi. Sońyna ádebı mol mura qaldyrǵan Dýlat Isabekulynyń jarqyn beınesi men ardaqty esimi halqymyzdyń júreginde máńgi saqtalady. Marqumnyń ımany salamat, jany jánnatta bolsyn!» – delingen kóńil aıtý hatynda.

Odan bólek, Premer-Mınıstr Oljas Bektenovtiń, Senat Tóraǵasy Máýlen Áshimbaevtyń, Májilis Tóraǵasy Erlan Qoshanovtyń, Shymkent, Qyzylorda, Taraz, SHQO, BQO óńirleriniń oblys ákimderiniń kóńil aıtý hattary oqyldy.

Marqumnyń jaqyn dostary, belgili qalamgerler Beksultan Nurjekeev, Tólen Ábdikter men Nurlan Orazalın, Asanáli Áshimovter jazýshynyń shyǵarmashylyǵy men ómiri jaıly jan tebirenter estelikterimen bólisti.

Qazaq ádebıetiniń qara nary, jazýshy Dýlat Isabekovpen qoshtasýǵa kelgen halyqtyń qarasy da kóp boldy.