Klasık jazýshy, belgili dramatýrg, Qazaqstannyń Eńbek Eri, Memlekettik syılyqtyń laýreaty Dýlat Isabekovti aqtyq saparǵa shyǵaryp salý rásiminen soń, marqumnyń rýhyna arnap Almaty qalasyndaǵy Qabyldaý úıinde Jazýshylar Odaǵy basqarmasynyń uıymdastyrýymen as berildi.

Aldymen Qazaqstannyń halyq ártisi Asanáli Áshimov aq batasyn berdi. Marqumnyń rýhyna arnalǵan asty Jazýshylar odaǵynyń basqarma tóraǵasy Mereke Qulkenov  ashyp, jazýshynyń ómiri men shyǵarmashylyǵy týraly tolǵana aıtyp berdi.

«Qazaq ádebıetin Dýlat Isabekovsiz elestetý múmkin emes. Qolynan qalamy túskenshe tek qazaq ádebıetine eńbek sińirdi. Biz óz ulylarymyzdy ulyqtaǵan, qadirlegen halyqpyz. Búkil Qazaqstan qazir qara jamylyp otyr»,  dedi Mereke Qulkenov.

Asqa Memlekettik hatshy Erlan Qarın men Almaty qalasynyń ákimi Erbolat Dosaev arnaıy kelip, qatysty.

Sonymen qatar jazýshy Kádirbek Segizbaev, aqyn Hanbıbi Esenǵaraeva, jazýshy, kınodramatýrg Smaǵul Elýbaı, Parlament Májilisiniń depýtaty Qazybek Isa, Qazaqstannyń halyq ártisi Tuńǵyshbaı Jamanqulov, ál-Farabı atyndaǵy Qazaq ulttyq ýnıversıtetiniń rektory Janseıit Túımebaevtar sóz sóıledi.

Odan bólek, Shyǵys Qazaqstan oblysy, Batys Qazaqstan oblysy, Qyzylorda, Shymkent, Taraz oblystarynan arnaıy delegasıa kelip, kóńil aıtty. 

Al Mádenıet jáne aqparat mınıstri Aıda Balaevanyń, Halyqaralyq túrki mádenıeti men murasy qorynyń prezıdenti Aqtoty Raıymqulovanyń, QMDB Tóraǵasy, Bas múftı Naýryzbaı qajy Taǵanulynyń kóńil aıtý hattary oqyldy.

P.S. Marqumnyń denesi Almaty qalasynda ornalasqan qoǵam qaıratkerleri men tanymal tulǵalaryna arnalǵan Keńsaı zıratyna jerlendi.