Etnıkalyq qazaqtarǵa – basqa elderdiń azamattaryna Qazaqstanda 10 jyl ómir súrýge jáne jumys isteýge quqyq beretin 65 «Ata joly» kartasy berildi. Elimizde óz isin damytýǵa daıyn bıznes-ımmıgranttar 27 karta aldy, al suranysqa ıe mamandar osyndaı 38 kartanyń ıegeri atandy.

«Qazaqtar qaı jerde ómir súrse de, olardyń jalǵyz Otany – Qazaqstan. Sondyqtan biz úshin shetelde turatyn otandastarymyzdy qoldaý árqashan mańyzdy», – dedi Qazaqstan Respýblıkasynyń Prezıdenti Qasym-Jomart Toqaev.

«Ata joly» kartasyn alýshylar ishinde ınjener-fızık, ınjener-matematık, hımıalyq tehnologtar, jaq-bet hırýrgıasynyń dárigerleri, pedıatrlar jáne t.b. mamandar bar, olar Reseı, Germanıa, Mońǵolıa, Qytaı, Ulybrıtanıa, AQSH, Izraıl, Fransıa, Nıderlandy, Fınlándıa, Qyrǵyzstan jáne Ózbekstan sekildi shet elderden keldi.

«Ata joly» kartasyn engizýdiń maqsaty tarıhı otanymen baılanysty nyǵaıtý, ulttyq dástúrlerdi saqtaý, Qazaqstanda olardyń áleýetin iske asyrý úshin elge kásipqoılar men tabysty bıznesmenderdi tartý bolyp tabylady. Bul Karta shetelde turatyn etnıkalyq qazaqtarǵa óz shyǵý elderiniń azamattyǵyn saqtaı otyryp beriledi.

«Ata joly» kartasynyń ıegerleri elge kirgen kezde 10 jyl merzimge turýǵa ruqsat alady jáne eńbek qyzmetin júzege asyrý nemese bıznes júrgizý úshin qonystaný óńirin derbes tańdaıdy.

«Ata joly» kartasy bar etnıkalyq qazaq basqa eldiń azamaty bola otyryp, Qazaqstan azamattarymen jáne qandastarmen teń quqyqtarǵa ıe.

«Ata joly» kartasynyń ıegerleri (jáne olardyń otbasy músheleri) mynadaı quqyqtarǵa ıe:

- medısınalyq kómektiń kepildik berilgen kólemi sheńberinde medısınalyq mekemelerde qyzmet jáne áleýmettik tólemder alý;

- QR Eńbek kodeksine jáne «Halyqtyń kóshi-qony týraly» QR Zańyna sáıkes Qazaqstan aýmaǵynda jumysqa ornalasý;

- QR Kásipkerlik kodeksine jáne ózge de quqyqtyq aktilerine sáıkes Qazaqstan aýmaǵynda kásipkerlik qyzmetti júzege asyrý;

- «Bilim týraly» QR zańyna sáıkes memlekettik bilim berý uıymdarynda tegin orta bilim alý, memlekettik orta arnaýly jáne/nemese joǵary oqý oryndarynda konkýrstyq negizde tegin orta arnaýly jáne/nemese joǵary bilim alý, jeke oqý oryndarynda aqyly bilim alý;

- «Advokattyq qyzmet jáne zań kómegi týraly» QR zańyna sáıkes memleket kepildik bergen zań kómegin alý;

- azamattyq salasyndaǵy halyqaralyq sharttarǵa jáne QR zańnamalyq quqyqtyq aktilerine sáıkes jeńildetilgen tártippen Qazaqstan Respýblıkasynyń azamattyǵyn alý.

«Ata joly» kartasy bar adamdardyń  QR Parlamenti men máslıhattaryna saılanýǵa, sondaı-aq saılaýda daýys berýge, respýblıkalyq referendýmǵa qatysýǵa quqyǵy joq ári memlekettik qyzmetke qabyldanbaıdy.

Eger «Ata joly» kartasynyń ıesi Qazaqstan azamattyǵyn alatyn bolsa, onda Karta jaramsyz dep tanylady.

Esterińizge sala keteıik, Memleket basshysynyń tapsyrmasy boıynsha 2023 jyldyń shildesinen bastap shetelde turatyn etnıkalyq qazaqtar úshin elge jeńil kirý/shyǵý máselesi pysyqtalǵan «Ata joly» kartasy engizildi.