«Nur Otan» partıasy Tóraǵasynyń Birinshi orynbasary Muhtar Qul-Muhammed Pavlodar oblysyna bardy dep habarlaıdy Qamshy.kz aqparat agenttigi. Sapar barysynda ol ındýstrıaldy-ınnovasıalyq damý memlekettik baǵdarlamasy aıasynda salynǵan kásiporyndarda boldy. Sondaı-aq, Pavlodar tústi metalýrgıa kolejiniń jańadan salynǵan Stýdentter úıine jáne Pavlodar memlekettik pedagogıkalyq ınstıtýty janyndaǵy «Margulan center» ǵylymı ortalyǵyna at basyn burdy.
Muhtar Qul-Muhammed oblys ákimi Bolat Baqaýovpen birge «Pavlodar» arnaıy ekonomıkalyq aımaǵyna bardy. Munda qazirdiń ózinde 6 ınovasıalyq kásiporyn jumys istep tur. Aldaǵy ýaqytta taǵy 6 óndiris orny iske qosylmaq.
Arnaıy ekonomıkalyq aımaqtaǵy zamanaýı óndiris oshaqtarynyń biri «Gıssenhaýz» zaýyty qospaly alúmını ónimderin daıyndaıdy. Tolyǵymen germanıalyq tehnologıamen jabdyqtalǵan mundaı óndiris orny Avstrıa, Germanıa sıaqty eýropanyń damyǵan elderindegi kásiporyndardan esh kem emes. Arnaıy ekonomıkalyq aımaǵynda ornalasqan «AgroHımProgress» zaýyty da tolyǵymen qazirgi zamanǵy qondyrǵylarmen jabdyqtalǵan. Indýstrıaldy-ınnovasıalyq damý memlekettik baǵdarlamasy arqyly salynǵan bul kásiporynda mıneraldy tyńaıtqyshtar, ósimdikterdi qorǵaýǵa arnalǵan hımıalyq qospalar, shegirtkege qarsy bıologıalyq dári-dármek jáne aramshópterge qarsy qoldanylatyn glıfosat-gerbısıd óndiriledi.
Atalǵan kásiporyndardyń jumysymen tanysqan «Nur Otan» partıasy Tóraǵasynyń Birinshi orynbasary Pavlodar óńiriniń osynshalyqty qarqyndy damýy Elbasymyzdyń eren eńbeginiń jemisi ekenin aıtty. Bul jóninde Muhtar Qul-Muhammed: «Elbasymyzdyń aıryqsha qamqorlyǵynyń arqasynda Pavlodar oblysynyń ekonomıkalyq, áleýmettik jáne rýhanı damýynda orasan zor órleý oryn alýda. Tek ındýstrıaldy-ınnovasıalyq damý baǵdarlamasy boıynsha óńirde 35 iri ónerkásip orny ashylyp, oǵan 1 trıllıon teńgeden astam qarajat bólindi. «Nurly jol» baǵdarlamasy boıynsha keıingi eki jylda ǵana oblysqa 125 mlrd. teńge qarjy jumsalǵan. Mundaı qarqyndy damý óńir tarıhynda buryn-sońdy bolǵan emes. Oblysta balabaqsha, mektep máselesi de birjolata sheshilgen. Halqymyzǵa qazaq ǵylymy men ádebıetiniń aıtýly qaıratkerlerin bergen óńirde «Rýhanı jańǵyrý» boıynsha da kóptegen jobalar júzege asýda. Pavlodarlyqtar Elbasynyń osy qamqorlyǵyn baǵalaı bilýi kerek», – dedi.
Sonymen qatar, Muhtar Qul-Muhammed Pavlodar tústi metalýrgıa kolejinde bolyp, stýdenttermen kezdesti. Odan bólek, Pavlodar memlekettik pedagogıkalyq ınstıtýty janyndaǵy «Margulan center» ǵylymı ortalyǵynda boldy. Onda ol «Rýhanı jańǵyrý» baǵdarlamasy boıynsha atqarylyp jatqan jumystarmen tanysty.
