(Jerlesimiz Aqseleý Seıdimbektiń ómirden ozǵanyna bes jyl tolýyna)

Áli esimde, qazaqtyń birtýar azamaty, belgili qalamger, jerlesimiz Aqseleý Seıdimbekovtiń 70 jyldyǵyna oraı, osy Jańaarqa topyraǵynda, Báıgetóbe basynda 2012 jyly marqumǵa as berildi. Kúz aıy edi. Bul kúni tabıǵat tosyn minez tanytyp, kún jańbyrly boldy. Dastarhan jaıylyp, dám tartylǵan kez bolatyn. Qazaqy kıgiz úıdiń shańyraǵynan sańlaý taýyp, úzilgen bir tamshy qazaqtyń belgili aqynynyń mańdaıyna tústi. Sol sátke kýáger bolyp otyrǵan men, erkimnen tys tilge oralǵan osy joldardyń birinshi jolyn:

- Aǵyp tústi mańdaıǵa kep bir tamshy... – dep daýystap aıtyp qalǵanym ǵoı, biraq dastarhan basynda otyrǵan qos aqyn tarapynan munyma esh qoldaý bolmady.

Aǵyp tústi mańdaıǵa kep bir tamshy,

Sol tamshynyń túsi múlde aldamshy.

Aqań jatqan báıge tóbe tósinde,

Túsin túster jaýhar jyrǵa sal qamshy.

Bári bar – aý bul tamshyda bári bar,

Tirshiliktiń ózek jalǵar nári bar.

Keńistikti keń sózdermen sóz etken,

Aqseleýden aırylǵan kún sheri bar.

Kúmbirlegen kúı dombyra sazy bar,

Saıyn dala, aptap ystyq jazy bar,

Er jigittiń ór kóńilin jyqpaıtyn,

Sulý qyzdyń jan eriter nazy bar.

Jan túrshiger jalǵandyqtyń zári bar,

Betten qaǵar qatal qystyń kári bar.

Kóńil tórin teńge tesken talaıǵa,

Sıpaı jaqsa em bolarlyq dári bar.

«Dáýrenaıdyń» sezim boılar áni bar,

Nasybaıdyń til qýyrǵan dámi bar.

Jánibektiń ánin tyńdap tamsanǵan,

Nar tulǵaly Aqseleýdiń   úni bar.

Bul tamshyda zamananyń zary bar,

Zańǵar taýdaı yza – kektiń qary bar.

Jolbıke bop jorǵalaǵan jamanǵa,

Ótkel bermes nárli sózdiń bári bar.

Kórgen tústeı ótti ómir jantalas,

Aqań   bıik kúıingenmen   baqtalas.

Zerli sóz ben bal tiline yntyqqan,

Aman bolsyn, qalyń qazaq zamandas.

               30.06.2014 jyl

Islam Mıashuly Amanov

Sýret: baq.kz