Túrkistan respýblıkalary federatıvtik negizde birigýi tıis. Ambısıalardy qaıyryp qoıyp, ortaq saıası qurylym jasaý týraly iske qazirden bastap kirisken durys. Áıtpese, «Ózbekpen birikkenshe, oryspen bolǵanym artyq» deýshiler qatary kóbeıgen saıyn, bul maqsatqa jetý múmkindigi alystaı beredi. Eń aldymen, birinshi qadam – máńgilik dostyq sharttaryna qol jetkizý kerek. Qyrǵyzben jasalǵany sıaqty bul shart ózbekpen de (ózbekpen keıinnen jasaldy), túrkimenmen de, tájikpen de jasalýy kerek. Mustafa ylǵı da tájikterdi túrkistandyqtarǵa, tipti túrikterge qosyp otyratynyn kóremiz. Odan keıin federasıaǵa barý kerek. Biz oryspen de, qytaımen de, Túrkistan bolyp sóıleskenimiz jón. Qazaq, ózbek, qyrǵyz, t.b bolyp jeke-jeke sóıleskenimiz tıimsiz. Reseı de, Qytaı da óz yqpalyn keńeıtý, óz erkin tańý úshin, eń aldymen, bólip áketýge umtylady. Túrik bolyp, Túrkistan bolyp turýymyz olarǵa tıimsiz Oryspen birlesý kerek pe, joq, álde , óz qandastarymyzben (ózbek, qyrǵyz, túrkimen t.b) birlesýimiz kerek pe? Bul ekýiniń bireýin tańdaýdy bizge taǵdyr ótken ǵasyrdyń basynda qalaı qoıǵan bolsa, myna 21-ǵasyrdyń basynda taǵy bir ret ótkir qoıyp otyr. Bizdiń bul joly qatelesýimizge haqymyz joq. «Bólingendi bóri jeıtinin» HH ǵasyr jeterlikteı dáleldep berdi. Qazaq esin jıyp, bir jaǵyna shyǵýy, óz tegin, óz ulysyn, óz úıirin tabýy kerek.Tili de, dini de, dili de jat qytaı men orystan góri, bir atadan taraǵan, araz da bolsa týys-týmanyń jaqyn ekenin seziner ýaqyt boldy ǵoı, aǵaıyndar! Men Eýroazıa ıdeıasyn joqqa shyǵarmaımyn. Biraq ony qazaq – qazaq kúıinde, ózbek – ózbek kúıinde, túrkimen – túrkimen kúıinde, qyrǵyz – qyrǵyz kúıinde júzege asyra almaıdy. Sebebi, meni orysqa jutylyp ketý qaýpi shoshyndyrady. Teńdik, ádilettilik prınsıpteri myń ret qaıtalansa da, tıisti mehanızmderi jasalyp qoıylǵan kúnde de, orys orystyǵyn jasamaı tura almaıdy. Orystar basqa shaǵyn halyqtarmen teń bolýǵa daǵdylanbaǵan, ol – teńdikti qorlyq dep uǵýǵa úırengen halyq.

(Maqala marqum Aıtan Núsipqannyń jazbalarynan qysqartylyp alyndy)

Daıyndaǵan Nurtálik Sháripqazy