Bala kezimde jazdygúni naǵashy ájemniń úıinde bolatynymdy talaı ret jazdym. Sol baıaǵy masahananyń ishinde, yzyńdaǵan masany uryp, shegirtkeniń daýysyn estip, ýlap-shýlap jatqanymyzda, ájem marqum:
- Áı, júgermekter, uıyqtańdar! -dep zilsiz aıqaılaıdy. Bir kezde onyń:
- Eger uıyqtamasańdar qorqynyshty áńgime aıtpaımyn,-deıdi. Bizge keregi de sol. Tym-tyrys bola qalamyz. 
- Ótkende qaıtys bolǵan shaldyń asyna barǵanymda estigenmin. Bir kisiniń áıeli bala ústinen qaıtys bolyp, onyń artynda eki balasy qalypty. Súıgen jarynan aıyrylǵan erkek birazǵa deıin úılenbeı júripti. Biraq, áıelsiz úı qańyrap turady ǵoı. Úıdiń berekesi ketip, eki balaǵa ana izdep, aqyry tanystarynyń aqasynda bir shúıkebasty ákeledi. Álgi kelinshek á degennen týystary men kórshi-kólemge unap qalady. Momyn. Kóp sóılemeıdi. Úı sharýasyna da tyndyrymdy kelinshegine kúıeýi de rıza bolypty. Bul kezde kishi ul eki jasqa kelip, úlkeni tórt jasta eken. Kishisi óte mazasyz, beımaz bolǵandyqtan jańa túsken kelin onsha-munsha jaqtyra bermepti. Óz qursaǵynan shyqpaǵan balany kim baýyryna birden basa qoısyn? Enesi men atasy oǵan asa mán bere qoımapty. Solaı ýaqyt jyljyp júre beredi. Bir kúni ata-enesi kishi uldy úılendirip, sonyń qolyna ketedi. Al, kúıeýi bolsa mashınıst bolyp temirjolda jumys istegennen soń, keıde aptalap jolda bolady eken. Kishi ul anasyn saǵynady ma, álde ýyzyna jarymaı embegennen be, kim bilsin, ákesi jolǵa shyqqannan ańyrap jylaı beredi. Osy kezde ógeı ananyń ishine saıtan kirip, eki baladan qutylýdyń jolyn izdeıdi. Bular ózderi rázezdiń(razezd) dál janynda turǵandyqtan, ógeı shesheıge bul tıimdi bolady. Sóıtedi de, eki balany qolynan jetektep poezd joldyń ústindegi reliske baılaı bastaıdy.
- Apa, ne istep jatsyz? -deıdi úlkeni kúlimsirep. 
- Osy jerde jatsańdar, qazir poezd keledi sony kóresińder, qozǵalmańdar, jaraı ma?- deıdi ógeı ana aldaýsyratyp.
Qýanyp ketken eki balaqaı máz bolyp jatady. Sóıtedi de ógeı shesheı sábılerden qutylǵanyna máz bolyp, úıge qaraı qasha jóneledi. 
Sábılerdiń alańsyz aspanǵa qarap jatqanyna da biraz ýaqyt ótedi. Bul kezde kesh te batyńqyrap qalǵan edi. Bireýi byldyrlap, ekinshisi kúlimdep poezdy kútip jatqanynda, gúrildegen parovozdyń daýysy shyǵady. Qatty shyqqan daýystan qorqyp ketken qos qulynshaq shyrqyrap jylaı bastaıdy. Úlkeni baılanǵan jipti ıtergenimen kúshi jetpeıdi. Osy kezde Qudaıdyń qudiretimen parovoz kilt toqtaı qalady. İshinen mashınıst pen kómekshisi shyǵyp, jerge qarasa eki sábıdiń typyrshyp, jylaǵanyn kóredi. Jalma-jan ekeýin sheship, habarlandyrý beredi. Keıin mashınısten suraǵan ǵoı:
- Qalaısha bildińder?-dep. Sonda álgi júrgizýshi:
- Qatty zyrǵyp kele jatqan edim, bir aq kıingen kelinshek qolyndaǵy qyzyl oramalymen qol bulǵaı berdi. Shoshyp kettim de, áreń toqtaı qaldym. Toqtaǵanym sol edi, álgi áıel joq bop ketti de, esesine myna eki sábıdiń jatqanyn kórdim,- depti kúrsinip. 
Qulyndarym, analaryńnyń tileýin tileńder. Sorly sheshe bala úshin otqa túsedi, shoqqa da tabany kúıedi. "Ákemdi alsań, al, Qudaı, sheshemdi qoı. Shekpen toqyp berse de ólmeımin ǵoı", -degen eken bir baıǵus. Ákeniń jaqsy kórgeni jezdedeı-aq. Áıel ólse, olar tósek jańǵyrta salady. Sondyqtan da, uıyqtar aldynda: Anashyma uzaq ómir ber dep uıyqtańdar, dep áńgimesin aıaqtady.
Sol áńgimeden keıin qansha jyldar ótse de, poezdǵa miner kezde álgi qos sábıdi arashalap qalǵan ananyń árýaǵy elesteıdi. Qurysyn, analarymyz aman bolsynshy!

Januıa tynyshtyǵy tobynan