QR Din isteri jáne azamattyq qoǵam mınıstri Nurlan Ermekbaev Fransýz Respýblıkasynyń Qazaqstandaǵy Tótenshe jáne Ókiletti Elshisi Fılıpp Martınemen kezdesti dep habarlaıdy Qamshy.kz aqparat agenttigi. 

Kezdesý barysynda Nurlan Ermekbaev Qazaqstannyń Fransıamen aradaǵy baılanystarǵa úlken mán beretinin jáne túrli saladaǵy ózara tıimdi yntymaqtastyqty joǵary baǵalaıtynyn atady. Sondaı-aq, mınıstr Fransıadaǵy dinı ahýal týraly bilýge yntaly ekenin bildirdi.

Fransıa Elshisi Fılıpp Martıne óz kezeginde konfesıaaralyq kelisimdi saqtaýdyń qazaqstandyq úlgisin zertteýge qyzyǵýshylyq bildirdi. Sonymen qatar, dıplomat Qazaqstanda Ortalyq Azıa elderiniń qatysýymen din máseleleri boıynsha Halyqaralyq forým ótkizýdi usyndy.

Nurlan Ermekbaev jáne Fılıpp Martıne Qazaqstan men Fransıa múddeli memlekettik organdarynyń tájirıbe almasý jáne dinı turǵydaǵy ekstremızm kórinisterine qarsy turý, deradıkalızasıa jáne dástúrli emes dinı aǵymdardyń ókilderin ońaltýda yqpaldastyqtyń tıimdi mehanızmin ázirleý qajettigin atady.

Kezdesý qorytyndysynda taraptar dinı saladaǵy yqpaldastyq pen tájirıbe almasý boıynsha yntymaqtastyqty jalǵastyrýǵa kelisti.

Aıta keteıik, bıyl Qazaqstan men Fransıa dıplomatıalyq qatynastardyń ornaýynyń 25 jyldyǵyn atap ótýde.