QR Táýelsizdigi kúnine oraı Batys Qazaqstan oblysynyń Syrym aýdanyndaǵy Araltóbe aýyldyq okrýginiń ortalyǵy «Nurly jol» baǵdarlamasynyń aıasynda jańǵyrtylǵan jańa aýyz sý júıesine saltanatty túrde iske qosyldy. Jobalyq quny 270 mln. teńge uzyndyǵy 17 shaqyrym jańa sý qubyry arqyly aýyldaǵy 200 úıge taza aýyz sý jetkizilip otyr.
Jańa júıeni sýmen qamtamasyz etý úshin aýyl syrtynan alty birdeı uńǵyma qazylǵan. Barlaý nátıjeleri kórsetkendeı bul uńǵymalardaǵy sýdyń lıtrge shaqqandaǵy ónimdiligi qalyptaǵy kórsetkishten bes esege artyq. Sýdyń mynadaı ónimdiligi jaǵdaıynda, Araltóbe aýylyn aýyz sýmen qamtý úshin bir uńǵymanyń ózi jetkilikti. Júıeniń ekinshi núktesiniń basynda syıymdylyǵy 25 tekshe metrdi quraıtyn sý munarasy men sý tazartý stansıasy ornalasqan.
– Memlekettiń damýy turǵyndarynyń turmys deńgeıimen ólshenedi. Keıingi jyldary Araltóbe aýyldyq okrýginde úlken jumystar jasaldy. Okrýg ortalyǵy men eldi mekender kógildir otynǵa qosyldy. Uıaly baılanys júıesi jańa sapamen jumys istep tur. Taza aýyz sý endi árbir araltóbeliktiń úıine deıin jetti. Jaqsylyq qutty bolsyn! – dedi Syrym aýdanynyń ákimi Tólegen Tóreǵalıev.
– Kógildir otyn kelgende qatty qýanǵanbyz. Gaz – aýyl adamynyń armany edi ǵoı. Táýelsizdik kúniniń qarsańynda aýyl aýyz sýdyń jańa júıesine qosyldy. Gazdyń kelýiniń ózi aýylǵa kádimgideı ajar ákelip edi, endi úı-úıge jetken taza aýyz sý turǵyn úılerdiń de qolaılylyǵyn arttyratyny sózsiz.
Bizder, araltóbelikter áýeli is basynda júrgen azamattarǵa razymyz. Jumystar óte júıeli júrdi. Turalaý, toqtaý bolǵan joq. Sý qubyryn jańalap-jańǵyrtý kezinde de aýyl aýyz sýsyz qalǵan joq. Elbasyna alǵysymyz sheksiz, – deıdi aýyl turǵyny Beıbit Bısenov.
Sonymen qatar, Táýelsizdik kúni merekesi qarsańynda BQO Terekti aýdanynyń Ańqaty aýylynda «Nurly jol» baǵdarlamasy boıynsha salynǵan taza sý qubyry paıdalanýǵa berildi.
Qurylystyń ashylýyna arnaıy kelgen aýdan ákimi Kárim Jaqypov, aýdandyq máslıhattyń hatshysy Áljan Nurǵalıev ańqatylyqtardy aldaǵy merekemen quttyqtap, sý qubyry ıgilikterine jarasyn degen tilekterin bildirdi. Tap osyndaı saltanatty rásim Aqjaıyq aýylynda da ótti.
Ańqaty aýyldyq okrýgi ardagerler keńesiniń tóraǵasy Qurmanǵazy Jalenov aýylǵa taza sý jetkizip, Elbasynyń tapsyrmalarynyń arqasynda osyndaı ıgilikterge qol jetkizgendigin aıtyp, ony is júzinde oryndaǵan tulǵalarǵa alǵysyn bildirdi.
Aıta ketý qajet, baǵdarlama aıasynda Táýelsizdik merekesi kúnine oraı oblystyń taǵy 4 aýyly jańa taza aýyz sý júıesine qosylmaq.
