Almatydaǵy QR Ulttyq kitaphanasynda qazaqtyń uly bıi, qoǵam jáne memleket qaıratkeri Qazybek bıdiń ómiri men qoǵamdyq qyzmeti týraly derekti fılmniń tusaýkeser rásimi ótti dep habarlaıdy Qamshy.kz aqparat agenttigi. Qazybek bıdiń 350 jyldyq mereıtoıyna oraılastyrylǵan bul derekti týyndy «Bolashaqqa baǵdar: rýhanı jańǵyrý» baǵdarlamasy aıasynda túsirilgen.
Fılmniń senarı avtorlary ári rejıserleri dramatýrg, rejıser Ǵazız Nasyrov pen kınodramatýrg, ónertanýshy Erlan Tóleýtaı. Avtorlar buǵan deıin shyǵarmashylyq birlestikte «Mádı Bápıuly» jáne «Táttimbet Qazanǵapuly» atty derekti fılmderdi túsirgen.
— Áýeli Qaraǵandy oblysyn kókteı ótip, sonan soń Pavlodar oblysyna shyqtyq. Bul ólkelerde Qazybek bı babamyzdyń tabanynyń izi qalǵan. Sondaı-aq, Ońtústik Qazaqstan men Qyzylorda oblystarynda da túsirilimder júrgizdik. Sonan soń, Astana asyp, Qaz daýysty Qazybek bıdiń ómiri men qoǵamdyq qyzmetin zerttegen ǵalymdarmen suhbatastyq. Uly bıden qalǵan jalǵyz jádiger - altyn zerli shapandy taspaladyq. Qaıta aınalyp, Qaz daýysty Qazybek bıdiń 350 jyldyq toıyna qatystyq, - dedi senarı avtory ári fılmniń teń rejıseri Erlan Tóleýtaı.
Fılmde Qytaı men Reseıdiń muraǵatynan Qazybek bıge qatysty derekter men el aýzyndaǵy ańyzdar qoldanylǵan. Tarıhı qujattarmen qatar, qoıylymdyq sahnalar engizilgen bul fılmge elimizdiń teatr jáne kıno akterleri túsken. Qazybek bıdiń róline QR eńbek sińirgen qaıratkeri, akter, Kereı han rólimen qalyń kórermenge tanylǵan Qaırat Kemalov shaqyrylǵan. Sonymen qatar, fılmde Aldabek Shalbaev, Saıat Merekenov, İńkár Ábdirash, Zarına Kármen jáne Abylaı hannyń urpaǵy Abylaı Qashqynbaev ta boı kórsetken.
Al fılmniń basty keıipkerleriniń biri - Qazybek bıdiń urpaǵy, belgili qoǵam qaıratkeri, antıadrolyq qozǵalystyń belsendi múshesi, sýretshi Káripbek Kúıikov.
- Qaz daýysty Qazybek bı 1764 jyly aqpan aıynda qaıtys bolǵanda qys qaharly, qar qalyń bolǵandyqtan, jer aıaǵy keńigenshe dep balasy Bekbolat pen Edige bıler uly bıdiń máıitin sórege saqtaýǵa uıǵarǵan. Osy qys aıynda bolǵan oqıǵany sýretteý úshin Alataýdyń bir asqar bıigi - 3800 metrlik "Molodejnyı" atalatyn bıik shyńyna shyǵyp, alty qanat úı tiktik. Óıtkeni mezgil tamyzdyń sońy, Alataýǵa qar túsip úlgermegendikten, osylaı jannan bezip, máńgi muzdyqtarǵa kóterilýge májbúr boldyq. Alataýdyń qulama jartasty, túpsiz shyńyraýlarynan asyp ótkenimizdiń ózi bir ǵajaıyp hıkaıa, - dedi Erlan Tóleýtaı.
