Qazposhta elimizdegi tuńǵysh Sıfrlyq keńseniń tusaýkeserin ótkizdi, dep habarlaıdy Qamshy.kz aqparat agenttigi QazAqparatqa silteme jasaı otyryp.
Qazposhtanyń tuńǵysh Sıfrlyq keńsesi Astana qalasynda ashylyp otyr. Keńsege kirgennen-aq Sizge Qýanysh atty robot «Qazposhtanyń sıfrlyq keńsesine qosh keldińizder» dep qarsy alady. Aldaǵy ýaqytta Qazposhta mundaı keńselerdi elimizdiń birneshe qalasynda iske qospaq. Munda qyzmetterdi ádettegideı operator qyzmetkerler emes, gıbrıdti bankomattar, elektrondyq kasır, poshtamat jáne VR-agent kórsetedi.
Qazposhtanyń bolashaq keńselerinde klıentter poshtalyq jáne qarjylyq qyzmetterdi ózderi atqara alady. Sondaı-aq post.kz saıty qyzmetteriniń munda barlyq túrin paıdalanýǵa bolady. Atap aıtqanda, aqsha aýdarymdaryn jasaýǵa, komýnaldyq tólemderdi, JQE buzǵany úshin aıyppuldardy tóleýge, avıa jáne temirjol bıletterin satyp alýǵa jáne t.b. qyzmetterdi oryndaýǵa bolady.
Kásipkerler úshin zamanaýı keńse biregeı qyzmetti usynyp otyr. Naqtyraq aıtqanda, bank pen ınkasatorlar qyzmetin almastyra alatyn elektrondyq kasırdiń qundylyǵy erekshe. Bólimshege kelip, óz kartańyzdy toltyrsańyz jetkilikti. Jabdyq bir jolda 100 mln teńgege deıin qabyldaıdy. Aqshany júıeniń ózi sanap, kýpúralar boıynsha irikteıdi.Operasıa sońynda klıentke chek beriledi. Qolma-qol aqsha berýde de elektrondyq kasır dál osylaı jumys isteıdi. Keshen 4-5 aı avtonomdy tártipte jumys jasaı beredi. Bankter 18-00-ge deıin qyzmet kórsetse, sıfrlyq keńse saǵat keshki 22:00-ge deıin ashyq bolady.
Bólimsheniń jumysyn tolyqtaı almastyra alatyn taǵy bir biregeı qurylǵy - gıbrıdti bankomat. Ol tólem kartasyna tapsyrys berýge jáne alýǵa kómektesedi, al aldaǵy ýaqytta saýsaq pen bet-álpet boıynsha bıometrıkalyq verıfıkasıalaý qosylǵannan keıin karta shotynan kartanyń ózinsiz qolma-qol aqsha alýǵa múmkindik týady.
Gıbrıtti bankomatta rost.kz saıtynyń komýnaldyq tólemderin, salyqtardy, kredıtterdi, JQE buzǵany úshin aıyppuldardy tóleý, aqshaaýdarymdary jáne depozıtterdi toltyrý sıaqty qyzmetter qoljetimdi bola túsken. Sondaı-aq baılanys ortalyǵy operatorymen habarlasýǵa jáne naqty ýaqyt rejıminde keńes alýǵa bolady.
Sıfrlyq keńsede gıbrıdti bankomatpen qatar, klasıkalyq bankomattar men tólem termınaldary qoıylǵan. Olar aıyppuldardy tóleýge jáne shetelge shyǵýǵa qoıylǵan shekteýdi alyp tastaýǵa múmkindik beredi. Klıentter JSN engizý arqyly óz moınynda bereshektiń bar-joqtyǵyn tekserip, tólem jasaýyna bolady. 5 mınýt ishinde klıenttiń bereshekti tólegeni týraly aqparat QR Ádilet mınıstrliginiń derekter bazasyna beriledi de, 30 mınýttan soń elden tysqarý shyǵýǵa salynǵan shekteý alynyp tastalady. Mundaı termınaldar elimizdiń 8 áýejaıynda ornatylǵan. Keler jyly qalalarǵa taǵy 120 termınal qoıylmaq.
«Sáýle degen keńesshi «Method-Pro» mektebimen birge jasaldy. Ol bizdiń klıentterdiń mańyzdy suraqtaryna jaýap beredi. Máselen, tólemdi qalaı júrgizýge bolatynyn, bank kartasyn qalaı alýǵa bolatynyn Sáýleden surap bile alasyz. Ázirge Sáýle 100 suraqqa jaýap bere alady. Álbette, bul alǵashqy nusqa bolǵandyqtan, biz onyń qyzmet aıasyn keńeıtýdi qola alamyz», -deıdi İT-sáýlet boıynsha Departament dırektory Baqtıar Muhametqalıev.
Ol sonymen birge, Qýanysh atty robot ta osyndaı suraqtarǵa jaýap bere alatynyn atap ótti. «Qýanysh kóbinese kelgen adamdardyń kóńilin kóterý úshin jumys isteıdi. Siz esimińizdi bir ret qana atasańyz, ol esine saqtap alyp,sizben áńgimelese beredi. Tipti erteńinde sizdi tanyp qoıyp, atyńyzdy atap, áńgime-dúkendi jalǵastyra berýge qaýqarly. Ol aýa-raıy týraly, qaıda turǵanyńyzdy aıtyp, Wi-fi paroliniń ózgergenin aıtyp berip turady», - deıdi Baqtıar Muhametqalıev.
