Almatyda VI - shaqyrylymdaǵy qalalyq máslıhattyń XXV-shi sesıasy barysynda qalanyń 2018 jylǵy búdjeti 431,2 mlrd. teńge kóleminde bekitildi. Ony jasaý kezinde barynsha kóp áleýmettik- ekonomıkalyq tıimdilik ákeletin ekonomıkalyq sheshimder nazarǵa alyndy. Búdjetke «nólden» saraptama jasalǵan soń qalanyń basty qarjy qujaty ákimshilik baǵyt boıynsha emes, «Almaty -2020» damý baǵdarlamasynyń basty qaǵıdalary men qalalyqtardyń áleýmettik qajettilikteri negizinde quryldy, dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasaı otyryp.
Keler jyly «nómiri birinshi baǵyt» retinde kógaldandyrýǵa, jasyldandyrýǵa, ekologıalyq jaǵdaıdy jaqsartýǵa erekshe mán beriledi, ıaǵnı qalany damytýǵa búdjettiń úshten biri jumsalady.
Sonymen qatar, qalanyń tarıhı ortalyǵyn qaıta jasaý jumystary odan ári jalǵasady, Tóle bı kóshesi - Dostyq dańǵyly- Abaı dańǵyly- Esentaı ózeniniń jaǵalaýy engen 178 ga jer jańarady. Keler jyly 17 jaıaý júrginshi aımaǵy abattandyrylady, halyqaralyq standart boıynsha jasalyp jatqan Respýblıka alańyn rekonstrýksıalaý aıaqtalady. Qaladaǵy saıabaqtardy, skverlerdi jáne jasyl aımaqty damytý úshin 2018 jyldyń búdjetinen ótken jylmen salystyrǵanda 6,3 ese kóp qarjy jumsalady.
Almatyda 2018 jyly 500 aýlany jóndeý qarastyrylǵan. Osylaısha, abattandyrylǵan aýlalar sany 33%-ǵa jetedi. Aıta keterligi, Almatyda sońǵy eki jyl ishinde 732 aýla alańdary jóndeldi, qaıta jasaldy, ıaǵnı árbir besinshi aýla.
Aryq júıelerin jóndeýge 3,3 ese kóp qarjy bólinedi.Eger bıyl 28 km aryq júıesi jóndelse, bul burnaǵy jyldarmen salystyrǵanda 3 ese kóp, Tabıǵı resýrstar basqarmasynyń aqparaty boıynsha keler jyly taǵy da 74 km aryq júıesin jóndeý josparlanǵan. Jalpy, aryqtar men jaýyn kanalızasıasyn jóndeý jumystary keshendi júrgizilip, aryq júıesin damytýdyń 10 jyldyq jospary jasalady.
Qoǵamdyq kólik pen kólik ınfraquyrylymyn damytý da jalǵasady. Bul eki baǵytqa basymdyq beriledi, barlyq shyǵynnyń besten bir bóligi jumsalady. Bıylǵy jyly qalanyń avtobýs parki 30%-ǵa jańardy, 180 km-dan astam jol jóndeldi.
Keler jyly joǵary sapaly qyzmet kórsetetin jańa avtobýstarǵa sýbsıdıa bólinedi. 600 myńnan astam qalalyqtardy jeńildetilgen keste boıynsha tasymaldaý jalǵasady.
Metronyń «Dostyk»,«Saryarqa» beketteriniń qurylysy odan ári jalǵasady, olar iske qosylǵanda jolaýshy legi 1,5 esege artyp, jylyna 18 mln. jolaýshy tasymaldanady. Keler jyly ınvestordy anytqaý boıynsha konkýrs ótedi, sonymen qatar JRK jobasynyń aıasynda jumystar qolǵa alynady.
Bulardan ózge, qalada syıymdylyǵy joǵary avtobýstarda jolaýshylardy ekspress-tasymaldaý qaıta jańǵyrady. Bıylǵy jyly BRT-nnyń alǵashqy kezeginiń 2,7 km jelisi jasaldy, 2018 jyly ekinshi kezeginiń JSQ jasalady.
Sel qaýpinen qorǵaný úshin 2018 jyly morendi kólderge monıtorıń júrgizýdiń sıfrly júıesi qolǵa alynady. Qazirgi kezde olar tik ushaq arqyly baqylaýǵa alynǵan. Aıta keterligi, bıyl Almatyda qymbat nasosty stansıalardy alýdyń arqasynda eń qaýipti 9 morendi kóldiń sýlary tartyldy.
Qala qaýipsizdigin saqtaýdyń basty mindeti áleýmettik nysandardyń seısmıkalyq qýatyn kúsheıtý bolyp tabylady. Osyǵan oraı, áleýmettik nysandardy seısmıkalyq kúsheıtýdiń 2025 jylǵa deıingi kezeńdi jospary jasaldy.
Mysaly, bıylǵy jyly 6 bala baqsha, 20 mektep, 1 balalar úıi seısmıkalyq kúsheıtildi, densaýlyq saqtaý salasynyń 8 nysanyn seısmıkalyq kúsheıtý jumystary aıaqtalyp qaldy. 7 myńnan astam nysan, sonyń ishinde mektepter, bala baqshalar, aýrýhanalar seımıkalyq jaǵynan pasporttaldy.
2018 jyly áleýmettik salaǵa barlyq shyǵyndardyń teń jartysy jumsalady.
Densaýlyq saqtaý salasynda dárimen jáne vaksınamen qamtý, medısınalyq jabdyqtar alý, kadrlardyń kásibı biliktiligin arttyrý, medısınalyq mekemelerdi durys jaǵdaıda ustaý qarastyrylǵan. Alataý aýdanyndaǵy jedel járdem stansıasy janyna qosalqy nysan salý josparlanǵan, osy salanyń 6 nysanyn seısmıkalyq kúsheıtýdiń JSQ jasaý jáne 6 bekti salý aıaqtalyp qaldy.
Jalpy, 2 jyl ishinde medısına uıymdaryn jabdyqtaý 75%-ǵa jetti, bul jumys sapasyn arttyryp, durys dıagonz qoıýǵa, syrqat túrin erte anyqtaýǵa yqpal etti.
Áleýmettik qorǵaýǵa 8,8 mlrd. teńge bólindi, onyń ishinde 20 myńnan astam adamǵa áleýmettik tólemder men járdemaqy beriledi, 9 mekeme men múgedekterge qarjylaı kómek kórsetiledi.
Bulardan ózge, 2018 jyly mektepterdiń aǵymdaǵy jóndeý jumystaryna, oqýlyqtar alýǵa, muǵalimder men tárbıeshilerge jalaqy tóleýge qarjy qarastyrylǵan. 8 bala baqsha salý josparlanǵan, 2 mektep janyndaǵy qosalqy nysan qurylysy aıaqtalady, pedagogıkalyq kolej janynan qosalqy nysan paıda bolady, №46 mektep seısmıkalyq kúsheıtiledi.
Jalpy, Almatynyń búgingi áleýmettik- ekonomıkalyq damýynyń barlyq kórsetkishteri oń dınamıkany kórsetýde. Mysaly, qalanyń ekonomıkalyq damý qarqynynyń ósýi 2017 jyldyń birinshi jartyjyldyǵynda 4%-dy, al 11 aı ishinde negizgi kapıtalǵa tartylǵan ınvestısıa 15,7%-dy qurady.
