Táýelsizdik kúni qarsańynda qalada jastarǵa nesıe berýdiń «Almaty jastary» synamaly baǵdarlamasy boıynsha kiltter men turǵyn úı sertıfıkattary tabys etildi, bul ómirsheń baǵdarlamany júzege asyrýǵa jergilikti búdjetten 1 mlrd. teńge bólindi.
Almaty ákimdigi men «Turǵynúıjınaqbanki» birigip qolǵa alǵan «Almaty Jastary» baǵdarlamasynyń basty ereksheligi jas mólsherin ulǵaıtyp, 35 jasqa deıingi jas almatylyqtardy qamtyǵanynda. Alǵashqy jarna tólemese de nesıe eń tómengi paıyz boıynsha beriledi jáne jastardyń qaıda jerde jumys isteıtindiginiń esh qatysy joq.
«Turǵyn úımen qamtamasyz etý – bul jastarǵa qatysty mańyzdy máseleniń biri, olardyń jumysqa ornalasýy, bilim alýy únemi jiti nazarda, sondyqtan «Almaty Jastary» baǵdarlamasynyń aıasynda jyl sońyna deıin 100 almatylyq jas otbasy jeke páterleriniń kiltitterin alady. Jastar baǵdarlamasy boıynsha berilgen zaemǵa Almatydan alǵashqy úıdi satyp alýǵa bolady, sóıtip aqsha qalada qalady. Iaǵnı, osy aqshadan qurylysshylarǵa jalaqy tólenedi, kásiporyndarǵa tapsyrys beriledi, qurylys kompanıalary qala búdjetine salyq tóleıdi», - dep atap ótti Almaty ákimi Baýyrjan Baıbek.
«Turǵynúıqurylysjınaqbanki» tóraǵasynyń orynbasary Janar Jubanıazova «Almaty Jastary» baǵdarlamasynyń barynsha ashyq bolýyn qamtamasyz etý úshin arnaıy www.almaty-zhastary.kz portaly ashylǵanyn, qatysýshylar soǵan ótinish bergenderin aıtty. Qujattardyń basym kópshiligi elektrondy úkimettiń óńirlik shlúzinde avtomatty túrde suryptaldy. Qujattardy qoǵam men jastar ókilderinen quralǵan turǵyn komısıasy qarady.
Sarapshylar baldyq júıe arqyly almaty jastary men jas otbasylarǵa qoldaý kórsetti. Mysaly, tuńǵysh bala úshin 10, keıingi ár bala úshin 15 baldan berildi.Jubaılyq ómirdiń ár jylyna eki baldan qosyldy.
Qosymsha baldarǵa menshik túrine qaramastan qalanyń áleýmettik salasynda jumys isteıtin jastar ıe boldy. Múmkindigi shekteýli jandarǵa qosymsha 10 baldan berildi. Almatynyń bıznes aqalasy ekendigi eskerilip, jas kásipkerlerge de qoldaý kórsetildi, mundaǵylar ár jumys istegen jyldary úshin bir jarym baldan aldy.
Jańa páterlerdiń kiltterin alǵashqy bolyp alǵandar qatarynda Ortalyq qalalyq klınıkalyq aýrýhana dárigeri Ásıa Mırtaeva, Qalalyq adam reprodýksıasy ortalyǵy zerthanasynyń mamany Raıgúl Janǵalıeva, «AvtoGazAlmaty» JSHS ınjener- operatory Nurlan Saparov jánge basqalary bar. Jalpy, baǵdarlama máresine 72-den 162 deıin bal jınaǵandar jetti.
Qala ákiminiń qolynan jeke páteriniń kiltin konkýrsta 92 bal jınaǵan jedel járdem feldsheriOksana Shefer aldy.
«Men Prezıdentimizge jáne osy baǵdarlamany uıymdastyrýshylarǵa úlken alǵys aıtamyn. Keler jyly da Almatyda jastar úshin turǵyn úı alýǵa jeńil nesıe beretin osy Baǵdarlamanyń jalǵasýyn qalaımyn. Páter alǵanymdy bilgen meniń áriptesterim, dostarym atalǵan baǵdarlamaǵa zor qyzyǵýshylyq tanytýda. Óz páterimizge ıe bolǵanymyz úshin biz baqyttymyz, barlyqtaryńyzdy aldaǵy merekelermen quttyqtaımyn», - dedi Oksana Shefer.
Oksana Sheferdiń jalǵyz ózi tárbılep otyrǵa toǵyz jasar qyzy Mılana qýanyshyn jasyra almaı: «Men jańa jyldy jańa úıde qarsy alatynymyzǵa óte qýanyshtymyn ári ıt asyraıtyn bolamyz!»-, dedi.
Eske salsaq, Elbasynyń tapsyrmasy boıynsha 2017 jyl Almatyda Jastar jyly bolyp jarıalanǵan edi. Jastar ómirin tereń saralaı kelip, Almatyda tuńǵysh ret «2020 jylǵa deıin jastardy qoldaýdyń jol kartasy» jasaldy. «UK «Almaty» ÁQK» AQ-nyń qarjylandyrýymen jataqhana salý jobasy qolǵa alyndy. 2000 oryndy tórt jataqhana qurylysy aıaqtalyp qaldy. Keler jyldan bastap 2,4 myń oryndy taǵy eki jataqhana qurylysy bastalady. Jalpy, 2020 jylǵa deıin qalada 7 myń oryndy 12 jataqhana salynady.
