Almatyda Hmelnıskıı kóshesin Maılın kóshesinen «Jas qanat» yqsham aýdanyna deıin úńgileý aıaqtaldy. Almaty ákimi jumys sapary barysynda jedel damyp kelde jatqan eldi mekendi qamtıtyn kólik ınfraqurylymyn qarap shyqty.
Almaty ákimi álemdik kúrdeli ekonomıkalyq jaǵdaıda memlekettiń ınfraqurylymdy damytýǵa qarjy bólgenin atap ótti. Uzyndyǵy 1,1 shaqyrym bolatyn jańa jol salý 2016 jyldyń maýsymynda bastalǵan edi. Jumys barysynda 400-den astam jańa jumys orny quryldy, merdiger kompanıa qala búdjetine 400 mln. teńge salyq tóledi, al eldi meken turǵyndary jańa jolǵa ıe boldy.
«El Prezıdenti aıtqandaı, túrli qoǵamnyń qozǵaýshy kúshi adam eńbegi bolyp tabylady, sondyqtan «eńbek adamy» ataný úlken qurmet. Sizderdiń alyp qoldaryńyzben úı salynýda, jol jasalýda, óndiris órkendeýde. Bul- qıyndyǵy men qaýpi mol qıyn jumys, biraq kıeli, óıtkeni osy eńbek arqyly memleket damyp, órken jaıady», - dep jumysshylarǵa alǵys bildirdi Baýyrjan Baıbek.
Jaqyn mańda ornalasqan mektep oqýshylary da Táýelsizdik kúni merekesi qarsańynda jaqsy syılyq jasaǵandarǵa alǵystaryn aıtty.
«Buryn biz aıaǵymyzǵa rezeńke etik kıip alyp batpaq pen sýdy keship ótip, mektepke nemese emhanaǵa barý úshin aınalyp júretinbiz. Endi júrý jeńil ári qolaıly, keshke qaraı qorqynyshty emes, jol jaryqpen qamtylǵan», - dedi balalar.
Aıta keterligi,Hmelnıskıı kóshesin tesip, úńgileýdiń máni zor, óıtkeni «Jas qanat» yqsham aýdanynda turatyn 11 myńǵa jýyq adamdy kólik ınfraqurylymymen qamtamasyz etedi. Eki kópir qurylysy aıaqtaldy, tórt jolaqty qozǵalys bóligi paıda boldy, onyń eki jaǵyna aryq júıesi jasaldy, jaryq kózderi ornatyldy,trotýarlar abattandyryldy, avtobýs qatynasy retteldi. Keler jyly «Jas qanat» yqsham aýdanynyń kósheleri jóndeledi.
