QR Densaýlyq saqtaý mınıstrligi 2018 jyldyń alǵashqy eki aıynda naýqastar tegin dári-dármekpen qamtylýy úshin qosymsha 894 mln teńge bóldi.

Bul týraly Almatyda ótken baspasóz máslıhaty barysynda qalalyq Densaýlyq saqtaý basqarmasynyń dárilik, materıaldyq-tehnıkalyq qamtý jáne monıtorıń bóliminiń basshysy Janar Boranbaeva aıtty.

Mınıstrlik qańtar-aqpandaǵy dárimen qamtý prosesi toqtap qalmaý úshin osy ýaqytqa qosymsha 894 mln teńge bóldi.

Onyń aıtýynsha, kidiris bolmaýy úshin, Úkimet Biryńǵaı dıstrıbútordyń satyp alý rásimderin retteıtin qaǵıdalaryna ózgertý engizý týraly sheshim qabyldady.

Iaǵnı, endi SK «Farmasıa» dárilik zattardyń úsh aılyq qajettiligin bir jerden satyp alatyn boldy. Bul qazaqstandyq naýqastar tegin dárige qysqa merzimde qol jetkize alatynyn bildiredi. 

Úkimet qaýlysy búgingi kúni kúshine endi jáne Biryńǵaı dıstrıbútor satyp alý rásimderiniń bastalǵanyn dereý jarıalady.

Dári-dármekterdiń úsh aılyq qajettiligin bir jerden satyp alý úshin 18,4 mlrd. teńge bólindi.

Naýqas azamattarǵa jyldyń basynda dárilik zattarǵa qysqa merzimde qol jetkizý qıyn bolyp kelgeni ras.

Osyǵan baılanysty qant dıabeti, aýtoımýndyq naýqastar 3 aılyq dárini ala almaı qalatynyn aıtyp alańdaýshylyq bildirip jatyr.

«Búginde Almatyda dári-dármekpen barlyq naýqastar qamtamasyz etilip otyr. Emhanalarda esepte turǵan adamdar túgel alady. Eshkim dárisiz qalmaýy úshin búdjetten 894 mln aqsha bólindi. Jeltoqsan, qańtar, aqpan aılarynda túgel dárimen qamtamasyz etiledi. Naýqastarǵa alańdaýǵa negiz joq», - dedi Janar Boranbaeva.

Sondaı-aq, 2018 jyldan bastap emhanalardyń janynan arnaıy dárihanalar ashylyp, esepte turǵan naýqastar sol jerden dári alatyn bolady.

Satyp alynatyn preparattardyń tizbesi, shekti  baǵasy, satyp alynatyn mólsheri jáne dári-dármekti jetkizý kesteleri kórsetilip, satyp alý rásimderiniń bastalýy týraly habarlandyrý 14 jeltoqsan kúni «SK-Farmasıa» kompanıasynyń  saıtynda jarıalandy.