16 jeltoqsanda Qytaıdyń Chansha qalasynda ótken Dımash Qudaıbergenniń jeke konsertiniń vıdeosyn «DımashAlı» shyǵarmashylyq ortalyǵynyń basshysy Qanat Aıtbaev jarıalady, dep Qamshy.kz aqparat agenttigi «QazAqparatqa» súıenip jazady. 

«On myń adamdyq zal lyq tolyp, kórermender kóterińki kóńil-kúımen konsertke úlken serpin berdi. Bul keshte qazaq, hanzý, fransýz, aǵylshyn tilderindegi ánder shyrqaldy. Dımashtyń oryndaýyndaǵy shyǵarmalardy Qytaı, Kanada, Amerıka, Reseı, Ýkraınalyq mýzykanttardan quralǵan orkestr súıemeldep, bıshiler bılerimen órnektedi. Kesh shymyldyǵy Qanat Aıtbaevtyń sózine jazylǵan Dımashtyń óziniń «Sálem» ánimen ashylyp, Ulyqpan Joldasovtyń Asqar Dúısenbiniń sózine jazylǵan «Juldyzym» ánimen jalǵasty», - dep jazdy Qanat Aıtbaev Instagramda.

Keshte, sonymen qatar, Aıgúl Bajanovanyń «Mahabbat ber maǵan» ániniń hanzý tilindegi nusqasy, Oral Baıseńgirdiń sózine jazylǵan Dımashtyń «Umytylmas kún» ánderi oryndalyp, tyńdarmandar birge qosylyp shyrqaǵan.

Budan bólek, Beıjiń qalasynan kelgen shyǵarmashylyq top zamanýı sahnalyq bezendirýdiń, rejıserlik ońtaıly sheshimderdiń sheberligin kórsete bilgen.

«Qytaı elindegi qazaq fólklorlyq trıosy qytaı halyqtyq trıosymen birlese shyǵarma oryndap konsertke kórik berdi - dostyq áýenderin tógiltti. Dımash ózin roıálmen súıemeldeı otyryp Estaıdyń «Qorlanyn» oryndady. Internasıonaldyq orkestrmen birge Nurǵısanyń «Álqıssasyn», Qurmanǵazynyń «Adaıyn» dombyramen tartty. Dımashtyń jaqynda jazylǵan «Álemde soǵys bolmasyn» atty tól týyndysy qytaı tilinde oryndalyp halyqty tebirentti. Kesh boıy kórermenderdiń qoshemeti, yqylasy erekshe boldy», - dep jazdy ánshiniń ákesi.

Konsertte krosover, etno, klasıka, pop baǵytyndaǵy jalpy sany otyz bir shyǵarma oryndalyp, kesh shymyldyǵy Saıat Ábenovtyń sózine jazylǵan Dımashtyń óziniń «Tátti eles» ánimenen jabyldy.