Osy aptada Bloomberg BTA Bankiniń «joǵalǵan aktıvterin» izdeý, Áblázov jáne Hrapýnovtyń otbasyna «Atlant muhıtynyń eki jaǵynan» taǵylǵan aıyptar jaıly egjeı-tegjeıli jazǵan. Batystyń ózge BAQ-tary Qazaqstan ınternetti baqylaýdy kúsheıtti jáne teleaýdıtorıa úshin talasta Reseıden utylyp otyr dep jazǵan. Bul týraly Qamshy.kz aqparat agenttigi Azattyqqa siltep jazady.

Áblázov pen Hrapýnovtyń hıkaıasy

Amerıkanyń Bloomberg jańalyqtar agenttigi BTA bankinen joǵalǵan aqshany izdeý sharalaryna qatysty tekserý men onyń burynǵy basshysy Muhtar Áblázovke jáne Almatynyń burynǵy ákimi Vıktor Hrapýnovtyń otbasyna taǵylǵan aıyptardy jan-jaqty sıpattaǵan «Qazaqstandyq bankten jymqyrylǵan mıllıardtardyń bir bóligin jasyrý úshin Trump SoHo-ny paıdalanǵan ba?» degen kólemdi maqala jarıalady.

«Qazaqstandyq BTA segiz jyldan beri úsh qurlyqta burynǵy tóraǵa Muhtar Áblázovke qarsy zań turǵysynan soǵys júrgizip keledi. Bul - qastandyq qateri, Qazaqstan úkimetiniń kompúterlerin buzý jáne banktiń kemi tórt mıllıard aktıvi jetpeıdi degen málimdemeler jasalǵan qaqtyǵysty qamtıdy. Qazir Atlantıkanyń eki jaǵynda [mysaly, London men Nú-Iorkte] qaralyp jatqan sot isteri álgi aktıvterdiń keıbiri Donald Dj.Tramptyń burynǵy qyzmetkerleri salǵan jyljymaıtyn múlikte jasyrylǵan joq pa degen suraqqa jaýap berýi múmkin» dep jazǵan Bloomberg.

Sot qujattarynda tirkelgen keı boljam derekterge sáıkes, Muhtar Áblázov óziniń kúıeýbalasy ári Vıktor Hrapýnovtyń asyrandy balasy İlıas Hrapýnovtyń kómegimen Trump SoHo ǵımaratynan jyljymaıtyn múlik satyp alǵan. Bloomberg nazaryna ilikken iske qatysty jaıttardyń biri - Jenevada qurylǵan Swiss Development Group SA fırmasy brıtandyq sottardyń aktıvterdi buǵattaý týraly qaýlylaryn aınalyp ótý úshin paıdalanyldy degen boljam.

«Bul ister Tramp pen onyń serikteri Shyǵystan ınvestısıa izdegen keıingi 10 jyl ishinde Qazaqstan men AQSH arasynda aqsha aǵyny qalaı júrdi degen suraqtyń betin ashýy múmkin. Tramptyń saılaý shtaby músheleri AQSH-ta 2016 jylǵy prezıdent saılaýyna yqpal etý úshin Reseımen sóz baılasqan degen kúdikti tekserip jatqan arnaıy prokýror Robert Múller [AQSH prezıdenti Donald Tramptyń] burynǵy keı serikteriniń zańsyz aqshanyń izin jasyrý jáne ózge de qarjylyq qylmystaryna qatysty aıǵaqtardy zertteý kezinde osy kezeńdi de qarastyryp jatyr» dep jazǵan Bloomberg.

Muhtar Áblázov pen Vıktor Hrapýnovtyń otbasy álgi aıyptardyń saıası astary bar, prezıdent Nursultan Nazarbaevtyń rejımin synaǵanymyz úshin qýdalaýǵa ushyradyq dep esepteıdi.

Bloombergtiń jazýynsha, Áblázovtiń saıası sebeppen qýdalaý týraly málimdemesin BTA dırektorlar keńesiniń qazirgi tóraǵasy, burynǵy premer ári Qazaqstannyń Reseıdegi qazirgi elshisi Imanǵalı Tasmaǵambetovtiń kúıeýbalasy Keńes Raqyshev «dalbasa ári men úshin eń úlken problema» dep ataǵan. Bloomberg Raqyshevtiń «Biraq meniń mindetim – aktıvterdi qaıtarý. Bul istiń bızneske qatysty bóligi túsinikti ári qarapaıym. Eger Áblázov aqshany zańdy jolmen tapqanyna senimdi bolsa, muny sotqa kelip dáleldeýi tıis» degen sózderin keltirgen.