26 jyl bolypty-aý egemendi
El bolyp eńse tiktep ońalǵaly
Jasymyzdy bir syǵyp janardaǵy
Basymyzdan qara bult joǵalǵaly...
Aqyndardyń jyryna arqaý bolǵan tuǵyrly Táýelsizdigimiz osyndaı shýmaqtarmen qalyn kórermenniń kóńilin terbep jatty.
Ústimizdegi jyldyń 14 jeltoqsanynda Aqtóbe qalasy «Óner ortalyǵyndaǵynyń» konserttik zalynda «Jyr arqaýy-Jańǵyrý» atty Respýblıkalyq aqyndar aıtysy ótti, dep jazady Qamshy.kz aqparat agenttigi.
Osymen jyldyń qorytyndy dodasy bolyp, báıgege Altyn dombyra tigiletin aıtýly shara osymen 6-shy márte ótkizilip otyr.
Qazaqstan Respýblıkasy Mádenıet jáne sport mınıstirliginiń uıymdastyrylýymen ótken bul aıtystyń Aqyn, satırık, Qazaqstannyń Eńbek sińirgen qaıratkeri, «Parasat» ordeniniń ıegeri, Qazaqstan Respýblıkasy Prezıdenti men Halyqaralyq «Alash» ádebı syılyqtarynyń laýreaty - Kópen Ámirbek tizginin ustap, júrgizýshilik etti.
Sondaı-aq, aıtysta qara qyldy qaq jaryp qazylyq qylǵan Qazaqstannyń halyq aqyny, qazylar alqasynyń tóraǵasy Qonysbaı Ábil, Halyq aqyny, «Parasat» ordeniniń ıegeri – Áselhan Qalybekova, Qazaqstan Respýblıkasy memlekettik syılyǵynyń laýreaty, Qazaqstan Respýblıkasynyń eńbek sińirgen qaıratkeri – Qoıshyǵara Salǵarauly, aqyn, jazýshylar odaǵynyń múshesi, «Qurmet» ordeniniń ıegeri – Meıirhan Aqdáýletuly, aqyn, Halyqaralyq «Alash» ádebı syılyǵynyń ıegeri – Janat Aımuhambetova, aıtysker aqyn, 2014-jylǵy altyn dombyranyń ıegeri – Balǵynbek Imash, jazýshy, Qazaqstan Respýblıkasynyń eńbek sińirgen qaıratkeri, «Qurmet» ordeniniń ıegeri – Qajyǵalı Muhanbetqalıuly syndy elimizge eleýli eńbek sińirgen aǵa-apalarymyz aqyndardyń baǵasyn berip ádil sheshimin shyǵardy.
On aqynnyń eki aınalymdaǵy jyr dodasynan oza shyǵyp, Bas báıgeni qanjyǵasyna baılaǵan jetisýdyń júırigi Jandarbek Bulǵaqov osymen ekinshi márte Altyn dombyra ıegeri atandy.
Birinshi oryndy Almaty qalasynan kelgen Syrym Áýezhan, ekinshi oryndy Ońtústik Qazaqstan oblysynyń atynan shyqqan Jarqynbek Naýshabek, úshinshi oryndy Astana qalasynan Aınur Tursynbaeva men Sara Toqtamysova jáne Jambyl oblysynan shyqqan Áset Dúısebaev ıelendi. Sondaı-aq, oryn almaǵan barlyq qatysýshylar da baǵaly syılyqtarmen marapattaldy.
Bul aıtysty ótkizýdegi basty maqsat aqyndardyń óreli óneri, órnekti sózderi arqyly Táýelsizdik murattary men qundylyqtaryn nasıhattaý, «Rýhanı jańǵyrý» baǵdarlamasynyń mańyzdylyǵyn kópshilikke pash etý, óskeleń urpaqty otansúıgishtikke tárbıeleý, qazaqtyń tól óneri, qudyretti sózi arqyly memlekettik tildiń mereıin arttyrý bolyp tabylady.
El Táýelsizdigi kúnine oraı ótkiziletin aıtystyń basty taqyryby elimizdiń jetistikteri men damýy, sondaı-aq, egemendi elimizdiń qalyptasý tarıhy.
Pikir qaldyrý