Almaty oblysyna alǵash ret Qytaıdyń Szánsý provınsıasy partıa komıtetiniń hatshysy Sın Chansın bastaǵan delegasıa keldi. Szánsý – kórshi eldegi ekonomıkasy qarqyndy damyǵan, qurylys, bilim berý, týrızm salalary boıynsha iri jobalardy júzege asyryp, ozyq tehnologıalardy engizý boıynsha aldyńǵy orynǵa ıe provınsıa. Oblys ákimi Marat Sultanǵazıev Qytaı delegasıasymen kezdesý ótkizip, saýda-ekonomıkalyq, ınvestısıalyq jáne mádenı-gýmanıtarlyq baılanystardy damytý máselelerin talqylady. Júzdesý barysynda taraptar óńiraralyq yntymaqtastyqty nyǵaıtýǵa baǵyttalǵan mańyzdy qujatqa qol qoıdy, – dep habarlaıdy Almaty oblysy ákiminiń baspasóz qyzmeti.
Marat Eleýsizuly óz sózinde Qazaqstan men Qytaı arasyndaǵy 34 jyldyq dıplomatıalyq qatynas ózara senimge, tatý kórshilik jáne strategıalyq áriptestikke negizdelgenin atap ótti.
«Eki el arasynda saýda-ekonomıkalyq, ınvestısıalyq, mádenı jáne gýmanıtarlyq salalarda aýqymdy birlesken bastamalar iske asyrylýda. Al eldiń shyǵysynda ornalasqan Almaty oblysy Qazaqstan men Qytaı arasyndaǵy baılanystyń mańyzdy kópiri sanalady. Óńir men QHR arasyndaǵy taýar aınalymy sońǵy jyldary 1 mlrd AQSH dollarynan asyp, turaqty ósim kórsetip keledi. Qazirgi ýaqytta Almaty oblysy aýmaǵynda Qytaı jáne birlesken kapıtaldyń qatysýymen 287 kásiporyn jumys isteıdi. Sońǵy 4 jyl ishinde meniń tikeleı basshylyǵymmen Qytaı Halyq Respýblıkasynyń 16 óńirinde 7 jumys sapary uıymdastyrylyp, oǵan óńirdegi 75-ten astam bıznes ókili qatysty.
Almaty oblysy men Szánsý provınsıasy arasyndaǵy yntymaqtastyq júıeli túrde damyp, mazmuny da tereńdep keledi. Szánsý – Qytaıdyń ekonomıka jáne ınovasıa salasyndaǵy jetekshi óńirleriniń biri. Sondyqtan biz ónerkásip, agroónerkásiptik keshen, logıstıka, ınvestısıa, joǵary tehnologıa salalary men «jasyl» ekonomıka baǵytynda uzaqmerzimdi, tıimdiligi joǵary jobalardy damytýǵa nıettimiz», – degen aımaq basshysy túrli baǵyttardaǵy birlesken jumystarǵa toqtaldy.
Aıtýynsha, qazirgi tańda óńirde jalpy qarajaty 6,2 trln teńge bolatyn, 216 ınvestısıalyq joba monıtorıńte tur. Al Qytaı kapıtalynyń qatysýymen jalpy quny 3,1 trln teńgeni quraıtyn 45 ınvestısıalyq joba bar. Bul bastamalardyń nátıjesinde 16 myńǵa jýyq turaqty jumys orny ashylady. Jyl basynan beri Qytaıdan kelgen ınvestorlarmen 90 kezdesý ótkizilgen. Bul jalpy ınvestısıalyq kezdesýlerdiń – 46,9%-y.
Búginde Qytaı tarapy oblys jastary úshin granttar usynyp otyr. Qytaıdyń provınsıalarynda óńirden shyqqan 56 talapker tegin oqyp jatyr. Olar bakalavrıat, magıstratýra jáne orta kásiptik bilim berý baǵdarlamalary boıynsha bilim alýda.
Eki el azamattary úshin engizilgen vızasyz rejım týrızm salasynyń belsendi damýyna yqpal etti. 2025 jyly Almaty oblysyna 147 000-nan astam sheteldik týrıs keldi, bul 2024 jylmen salystyrǵanda 13,19%-ǵa artyq. Onyń eń úlken bóligin Qytaı azamattary quraıdy. Bıyl Shanhaı qalasynda oblys ákimdiginiń Servıs ortalyǵy ashyldy. Bul – óńirdiń týrısik áleýetin ilgeriletýge baǵyttalǵan resmı ókildik. Almaty oblysy halyqaralyq týrısik alańdarda, onyń ishinde ITB China jáne ITB Asia kórmelerine qatysyp, sondaı-aq qytaılyq týroperatorlarmen, áýe kompanıalarymen, medıa ókilderimen belsendi jumys isteýde.
Jıyn barysynda Sın Chansın provınsıanyń ónerkásip, aýyl sharýashylyǵy, týrızm, bilim berý, tehnologıa jáne tabıǵı energıa kózin ıgerý baǵyttarynda atqarylyp jatqan jumystaryn tanystyrdy.
«Szánsý provınsıasynda 83 mıllıonnan astam halyq turady. Ekonomıkalyq kórsetkishi boıynsha Qytaıda 2-orynda. Naqtyraq aıtsaq, óńirlik ónim kólemi 2 trln AQSH dollarynan asady. Qazaqstan Qytaıdyń Ortalyq Azıadaǵy eń iri seriktesteriniń biri ári logıstıkalyq áleýeti halyqaralyq júk tasymalynda mańyzdy ról atqarady. Bizdiń maqsatymyz – óńiraralyq yntymaqtastyqty odan ári nyǵaıtyp, ózara tıimdi baılanys ornatý. Qol qoıylǵan memorandým eki tarap arasyndaǵy qarym-qatynasty tereńdetýge negiz bolady dep senemin», – dedi mártebeli meıman.
Osylaısha, Almaty oblysy men Szánsý provınsıasy arasyndaǵy yntymaqtastyq jańa kezeńge qadam basty. Sapar barysynda qazaq halqynyń san ǵasyrlyq tarıhy men mádenıetinen syr shertetin mazmundy kórme uıymdastyryldy. Qonaqtar nazaryna oblys aýmaǵynan tabylǵan Altyn adam men ózge de qundy arheologıalyq jádigerler usynylyp, olardyń tarıhı qundylyǵy men ǵylymı mańyzy jan-jaqty baıandaldy. Óńirdiń aldaǵy ýaqytta júzege asyrylatyn iri jobalary tanystyrylyp, birlesken bastamalardy damytý múmkindikteri keńinen talqylandy.
