Abaı oblysynyń Aqsýat aýdanynda ótken «Asyl besik – Aqsýat» sport jáne óner festıvali dástúrli gala-konsertpen qorytyndylandy. Úsh kún boıy ulttyq sporttyń dúbiri men rýhanıattyń taǵylymyna kýá bolǵan jurtshylyq festıváldiń sońǵy keshinde án men ónerdiń merekesin tamashalady.
Búginde respýblıka kóleminde keńinen tanylǵan «Asyl besik – Aqsýat» festıvali ulttyq sportty, óner men rýhanıatty toǵystyrǵan biregeı jobaǵa aınaldy. Belgili kásipker, mesenat, ASSYLTAS qoǵamdyq qorynyń negizin qalaýshy, Aqsýat óńiriniń týmasy Dýlat Tursynuly Tastekeıdiń bastamasymen júzege asyp kele jatqan festıváldiń basty maqsaty – týǵan jerdiń mereıin ósirý, ulttyq qundylyqtardy dáripteý jáne jastardy óner men sportqa baýlý.
Festıváldiń tarıhy 2019 jyly bastaý alǵan «Tuǵyry bıik Tarbaǵataı» jobasynan bastalady. Keıin bul bastama jańa mazmunmen tolyǵyp, «Asyl besik – Aqsýat» festıvali retinde jalǵasyn tapty. Búginde bul joba óńirdegi ǵana emes, el kólemindegi mańyzdy mádenı-rýhanı sharalardyń birine aınalyp otyr.
Bıylǵy festıvál baǵdarlamasy burynǵydan da aýqymdy boldy. Aqsýat tórinde qazaq kúresinen «ASSYL ARLAN» respýblıkalyq týrnıri, toǵyzqumalaqtan respýblıkalyq týrnır, aýdaryspaq jarysy, «ASSYL TULPAR» báıgesi uıymdastyryldy. Sonymen qatar «Artyq bilim – kitapta» oblystyq kitap oqý baıqaýynyń fınaly ótkizilip, úzdik komandaǵa avtokólik tabystaldy.
Festıváldiń qorytyndy gala-konserti úsh kúndik merekeniń sharyqtaý shegine aınaldy. Aqsýattyń ortalyq alańyna jınalǵan myńdaǵan kórermen tanymal óner juldyzdarynyń ónerin tamashalady.
Kesh shymyldyǵyn Erjan Esengeldi ashyp, kórermenge týǵan jer men ulttyq rýh taqyrybyndaǵy ánderin usyndy. Sonymen qatar sahnada Serik Isahan, Janar Serikbekqyzy, Sáýlejan Taqzıa, Aspanbek Shuǵataı, Qajymurat Sheshenqul, Dıdar sekildi ónerpazdar óner kórsetti. Ásirese týǵan ólke týraly ánder kórermenniń erekshe yqylasyna bólenip, Aqsýattyń qasıeti men Tarbaǵataı óńiriniń tarıhyn án arqyly órnektedi.
Keshtiń ekinshi bóliginde qazaqstandyq estradanyń tanymal ókilderi sahnaǵa shyqty. Kópshiliktiń ystyq yqylasyna bólengen Ábdijappar Álqoja óz shyǵarmalaryn oryndap, kórermenmen erkin syrlasty. Sondaı-aq Aıdana Medenova, TURAR, Jasulan Kópbergen men Shuǵyla Eshen, Niyazkul, Aıbek Serikhanov, BAYANSULU, BYTANAT & MONNY sekildi óner ıeleri festıvál qonaqtaryna kóterińki kóńil kúı syılady.
Konserttiń basty ereksheligi – ár býynnyń talǵamyn eskere otyryp jasalǵan baǵdarlamasynda boldy. Bir sahnada dástúrli án men zamanaýı estrada, týǵan jer taqyryby men jastar shyǵarmashylyǵy úndesip, ulttyq ónerdiń sabaqtastyǵyn kórsetti.
«Asyl besik – Aqsýat» festıvali sońǵy jyldary tek sporttyq nemese mádenı shara ǵana emes, eldik qundylyqtardy dáripteıtin iri qoǵamdyq joba retinde qalyptasyp keledi. Onyń basty urany – «Týǵan jerge týyńdy tik». Bul ıdeıa festıváldiń barlyq baǵyty arqyly kórinis taýyp, týǵan jerge qyzmet etýdiń úzdik úlgisine aınaldy.
Aqsýat aspanyn ánge bólegen gala-konsert festıváldiń jarqyn qorytyndysy boldy. Ulttyq sporttyń dúbiri, kitaptyń qudireti, ónerdiń qýaty men týǵan jerge degen qurmet toǵysqan úsh kúndik mereke kórermen jadynda uzaq saqtalary sózsiz.
