Úkimet 2025 jyly ónerkásip, kólik, energetıka, sıfrlandyrý men tereń óńdeý salalaryn belsendi damytý boıynsha jumystardy jalǵastyrdy. Negizgi baǵyttardyń biri – avtomobıl jasaý, jasandy ıntellekt jáne tehnologıalyq ekojúıeni damytý. Bul týraly Májilistiń jalpy otyrysynda qarjy mınıstri Mádı Takıev málimdedi.
«Úkimet ónerkásip, kólik, energetıka, sıfrlandyrý men tereń óńdeý salalaryn belsendi damytý boıynsha jumystardy jalǵastyrýda. Avtomobıl jasaý salasynda, Qostanaı oblysyndaǵy KIA zaýyty jáne Almaty qalasyndaǵy «Astana Motors» mýltıbrend zaýyty iske qosyldy. Jalpy, jyl saıyn shyǵaryp otyrǵan 160 myń avtomobıl, bul salany edáýir ulǵaıtýǵa múmkindik berdi», — dedi Mádı Takıev.
Sıfrlandyrý jáne jasandy ıntellekt salasynda Alem.AI Halyqaralyq jasandy ıntellekt ortalyǵy ashyldy. Alem.AI tujyrymdamasy sheńberinde Jasandy ıntellekt salasynda myńdaǵan mamandar daıarlaý, jyl saıyn júzdegen startaptar men ondaǵan zertteý jobalaryn qoldaý josparlanyp otyr.
«20 joǵary oqý orny bazasynda jasandy ıntellekt boıynsha mamandar daıarlaý bastalsa, «Bolashaq» baǵdarlamasy boıynsha jeke kvota engizildi. Astana Hub – tehnologıalyq kompanıalar men startaptarǵa arnalǵan alań retinde damýyn jalǵastyrýda. Onda 2 200-den astam IT-kompanıa, onyń ishinde 500-den astam sheteldik kompanıalar tirkelgen», — dedi qarjy mınıstri.
