Májiliste «Qazaqstan Respýblıkasynyń jańa Konstıtýsıasyn qabyldaýǵa baılanysty raqymshylyq jasaý týraly» zań jobasy birinshi oqylymda tanystyryldy. Qujat Memleket basshysynyń bıyl 17 naýryzda jarıalaǵan bastamasyn iske asyrýǵa baǵyttalǵan.

Zań jobasyn tanystyrǵan depýtat Abzal Quspannyń aıtýynsha, bul jolǵy raqymshylyqtyń ereksheligi – Qazaqstanda alǵash ret qylmystyq jáne ákimshilik raqymshylyq qatar júrgiziledi.

Qujatqa sáıkes, qylmystyq teris qylyqtar, aýyrlyǵy az qylmystar, sondaı-aq keltirilgen zalaly tolyq ótelgen ortasha aýyr qylmystar boıynsha qylmystyq ister toqtatylýy múmkin. Sondaı-aq osy sanattaǵy qylmystar úshin sottalǵan azamattardy jazadan bosatý jáne ortasha aýyr, aýyr jáne asa aýyr qylmystar boıynsha sottalǵandardyń jazasynyń ótelmegen bóligin qysqartý usynylyp otyr.

Sonymen birge raqymshylyq sybaılas jemqorlyq, terorızm, ekstremızm, kámeletke tolmaǵandarǵa qarsy jynystyq qylmystar, azaptaý, qaıtalanǵan aýyr qylmystar jáne basqa da qoǵamdyq qaýipti áreketter jasaǵandarǵa qoldanylmaıdy.

Zań jobasy ákimshilik quqyq buzýshylyqtar úshin salynǵan aıyppuldardy da keshirýdi kózdeıdi. Atap aıtqanda, jeke tulǵalar, jeke kásipkerler, notarıýstar, jeke sot oryndaýshylary, advokattar men zań konsýltanttary ákimshilik aıyppuldan bosatylýy múmkin. Alaıda bul jeńildik sottar taǵaıyndaǵan aıyppuldarǵa jáne qoǵamdyq qaýipsizdikke qater tóndiretin quqyq buzýshylyqtarǵa qatysty qoldanylmaıdy.

Depýtattyń málimetinshe, raqymshylyq jasaý týraly túpkilikti sheshimdi ár sottalǵan adamǵa qatysty sot jeke qaraıdy.

Sondaı-aq zań jobasynda bas bostandyǵynan aıyrý oryndarynan bosatylatyn azamattardy qoǵamǵa beıimdeý jáne qaıta áleýmettendirý mindeti jergilikti atqarýshy organdarǵa júkteledi.

Zań qabyldanǵan jaǵdaıda, ol qosymsha búdjet shyǵyndaryn talap etpeıdi jáne áleýmettik-ekonomıkalyq teris saldarǵa ákelmeıdi dep kútilýde.