Almaty oblysyna jumys saparymen kelgen Qazaqstan Respýblıkasynyń Kólik mınıstri Nurlan Saýranbaev oblys ákimi Marat Sultanǵazıevpen birge Qonaev qalasyndaǵy temirjol vokzalyn jańǵyrtý jumystaryn kórdi.
Vokzal aýmaǵyndaǵy qurylystyń qarqyndy júrip, búginde aıaqtalýǵa taıaǵan. Ǵımarattyń negizgi kelbeti qalyptasyp, ishki árleý men ınjenerlik júıelerdi iske qosý jumystary atqarylýda. Qurylys alańynda merdiger uıymdardyń mamandary belgilengen merzimge úlgerý úshin jumysty júıeli jalǵastyrýda.
Nysan basynda ótken kóshpeli keńeste oblys ákimdigi, «Qazaqstan temir joly» UQ» AQ jáne jaýapty mekemelerdiń ókilderi jobanyń oryndalý barysy jóninde esep berdi.
Mamandardyń aıtýynsha, búginde qurylys-montaj jumystarynyń 93 paıyzy aıaqtalǵan. Qazirgi tańda syrtqy elektr jáne gaz jelilerin qosý, sondaı-aq ǵımaratty jıhazben jáne zamanaýı keńse tehnıkasymen jabdyqtaý jumystary júrgizilýde.
Vokzal ǵımaratynyń qabyrǵalary tolyq turǵyzylyp, shatyr jabylǵan. Sý qubyry, káriz, jylytý jáne jeldetý júıeleri ornatylǵan. Jolaýshylar platformasynyń qurylysy da tolyq aıaqtalǵan.
Jalpy aýmaǵy 503,8 sharshy metr bolatyn nysandy bıylǵy maýsym aıynyń sońyna deıin paıdalanýǵa berý josparlanyp otyr.
Jıyn barysynda oblystaǵy ózge de temirjol vokzaldaryn jańǵyrtý jumystary saralandy. Qazybek bek (Uzynaǵash) jáne Shamalǵan vokzaldarynyń daıyndyǵy 99 paıyzǵa, Jetisý vokzalyndaǵy jumystardyń oryndalýy 92 paıyzǵa jetken.
Kólik mınıstri qurylys qarqynyn oń baǵalap, jaýapty mekemelerge barlyq jumysty belgilengen merzimde aıaqtap, nysandardy ýaqytyly paıdalanýǵa berýdi tapsyrdy. Onyń aıtýynsha, jańǵyrtylǵan vokzaldar jolaýshylar úshin qolaıly ári qaýipsiz bolýy tıis.
Aıta keteıik, Memleket basshysynyń tapsyrmasyna sáıkes elimizde 124 temirjol vokzalyn jańǵyrtýǵa baǵyttalǵan aýqymdy baǵdarlama júzege asyrylyp jatyr. Bul bastama aıasynda vokzaldar zamanaýı ınjenerlik júıelermen jabdyqtalyp, kútý zaldary jańartylyp, servıstik qyzmet kórsetý sapasy jaqsartylýda. Sonymen qatar múmkindigi shekteýli azamattardyń kedergisiz qatynaýyna qajetti jaǵdaılar qarastyrylǵan.
Mundaı jobalar elimizdiń kólik-logıstıkalyq áleýetin nyǵaıtýǵa yqpal etedi.
Qonaevtaǵy vokzaldyń jańarýy da – osy baǵyttaǵy mańyzdy qadamdardyń biri.