Memlekettik rámizder kúni qarsańynda Almaty oblysynda patrıottyq rýh pen súıispenshilik sezimin oıatatyn mazmundy sharalar legi tolastaǵan joq. Solardyń biri Qonaev qalasyndaǵy ortalyq alańda ótti. Shara barysynda arnaıy tikushaq Kók Týymyzdy kók aspanda qalyqtatyp, jınalǵan qaýymnyń rýhyn oıatty. Ánuranymyz áýelete shyrqalyp, Eltańbanyń táýelsizdigimizdiń sımvoly retindegi mán-mańyzy nasıhattaldy. Memlekettik qyzmetkerler ant qabyldap, oblystyń damý jolynda aıanbaı eńbek etken jandar marapattaldy.

Saltanatty jıynda Memlekettik Týdyń áýede qalyqtaǵan áserli sáti erekshe este qaldy. Qonaev aspanynda jelbiregen Kók baıraǵymyz táýelsiz eldiń asqaq bolmysyn, bereke-birligi men jarqyn bolashaqqa degen senimin aıqyn kórsetti. Jınalǵan qaýymnyń boıynda maqtanysh sezimin oıatyp, Memlekettik rámizderge degen qurmetin odan ári arttyra tústi.

Sharaǵa oblys ákimi Marat Sultanǵazıev qatysyp, turǵyndardy aıtýly merekemen quttyqtady.
«1992 jyly 4 maýsymda Táýelsiz Qazaqstannyń alǵashqy Memlekettik Týy men Eltańbasy resmı túrde bekitilip, shejiremizdiń jańa paraǵy ashyldy. Sháken Nıazbekovtiń aıbyndy Kók Týy men Jandarbek Málibekov pen Shot-Aman Ýálıhanovtyń biregeı Eltańbasy, keıinnen Shámshi Qaldaıaqovtyń áýezdi ánimen tolyqqan Ánuranymyz ulttyq bolmysymyz ben azattyq rýhymyzdyń máńgilik sımvolyna aınaldy.

Memleket Basshysy Qasym-Jomart Toqaev: «Ult rámizderi – Táýelsizdigimizdiń kıeli boıtumary, myzǵymas memlekettigimizdiń belgisi. Qasterli nyshandarymyz Qazaqstannyń egemen el, eńseli jurt ekenin jer júzine áıgileıdi», – dep rámizderdiń mańyzdylyǵyna erekshe toqtalǵan bolatyn.
Bıylǵy merekeniń biz úshin mańyzy tipten erekshe, sebebi elimiz jalpyhalyqtyq referendýmda qabyldaǵan Jańa Konstıtýsıanyń qaǵıdattaryna súıene otyryp, damýdyń jańa kezeńine qadam basty. Jańarǵan Ata Zańymyz – Ádiletti Qazaqstandy qurý jolyndaǵy memleketimizdiń egemendigi men tutastyǵynyń basty kepili. Osyǵan oraı, «Rámizder rýhy – Konstıtýsıa kúshi» jalpyulttyq patrıottyq aksıasy aıasynda qoǵamda ulttyq rýh bekemdelip, Ata Zań men rámizderge degen qurmet mádenıeti jańa deńgeıge kóterilýde.

Memlekettik rámizderimizde búkil Qazaqstan halqyn biriktiretin qudyretti kúsh bar. Táýelsizdigimizdiń altyn kúmbezi sanalatyn nyshandarymyzdyń mártebesi arta bersin», – dedi aımaq basshysy.

Sondaı-aq óńir damýyna úles qosyp júrgen birqatar azamatty Memlekettik nagradamen marapattady. Solardyń biri – 40 jylǵa jýyq ýaqyt boıy bilim salasynda eńbek etken, Qarasaı aýdany Shalqar orta mektebiniń dırektory Baný Amanova. «Búgingi Memlekettik rámizder kúninde «Qurmet» ordenimen marapattalý men úshin úlken mártebe. Bul meniń ǵana emes, bilim salasyna ólsheýsiz úles qosyp kele jatqan barlyq áriptesterimniń, barlyq ustazdardyń eńbegi dep baǵalaımyn. Osy qajyrly eńbegimizdi elep-eskerip jatqan Prezıdentimizge, oblys ákimdigine, oblystyq bilim basqarmasyna alǵysym sheksiz. Táýelsizdigimiz tuǵyrly bolsyn. Kók Týymyz, Ánuranymyz ben Eltańbamyz Otanymyzben birge máńgi jasasyn. Elimizdiń dańqy asqaqtaı bersin», – dedi marapat ıesi.

Shara barysynda memlekettik qyzmettiń túrli baǵytynda eńbek jolyn bastaǵan mamandar elge adal qyzmet etip, Konstıtýsıa zańdaryn berik saqtaýǵa saltanatty túrde ant berdi.
Osylaısha, egemendik aıshyǵy bolǵan Memlekettik rámizder kúni Almaty oblysynda máni tereń, kóńilge rýhanı serpilis syılaıtyn mazmundy sharalarmen joǵary deńgeıde atalyp ótti.