Memlekettik rámizder kúni qarsańynda Almaty oblysynyń ákimi Marat Sultanǵazıev Qonaev qalasyndaǵy Berdibek Soqpaqbaev atyndaǵy saıabaqta balalarmen kezdesti.
Erkin formatta ótken kezdesýge 35-ke jýyq bala qatysty. Ashyq aspan astynda uıymdastyrylǵan júzdesý barysynda oqýshylar oblys ákimine ózderin qyzyqtyrǵan suraqtaryn qoıyp, Qazaqstannyń memlekettik rámizderiniń tarıhy men mańyzy týraly pikir almasty.
Kezdesý barysynda Marat Sultanǵazıev balalarǵa Memlekettik Tý, Eltańba jáne Ánurannyń táýelsiz Qazaqstannyń basty nyshandary ekenin aıtyp, olardy qurmetteý ár azamattyń paryzy ekenin atap ótti.
Sondaı-aq ákim memlekettik rámizderge qatysty qyzyqty derektermen bólisti. Ásirese, kók Týdyń ǵarysh keńistigine kóterilip, álemniń eń bıik shyńdarynda jelbiregeni týraly aıtylǵan málimetter balalardyń erekshe qyzyǵýshylyǵyn týdyrdy.
Shara barysynda balalar memlekettik rámizderdiń avtorlary, olardyń mán-maǵynasy jáne Qazaqstannyń halyqaralyq deńgeıdegi jetistikteri týraly suraqtar qoıdy. Kezdesý ashyq dıalog formatynda ótip, jas qatysýshylar óz oılaryn erkin jetkizýge múmkindik aldy.
Oblys ákimi mundaı kezdesýlerdiń jas urpaqtyń boıynda patrıottyq qundylyqtardy qalyptastyrýda mańyzdy ról atqaratynyn atap ótti.
“Memlekettik rámizder – bizdiń táýelsizdigimizdiń, birligimizdiń jáne eldigimizdiń belgisi. Olardy qurmetteý – týǵan elge degen qurmettiń kórinisi”, – dedi Marat Sultanǵazıev.
Aıta keteıik, Memlekettik rámizder kúni jyl saıyn 4 maýsymda atalyp ótiledi. Bul kún qazaqstandyqtardyń eldik qundylyqtarǵa degen qurmetin arttyrýǵa jáne óskeleń urpaqtyń patrıottyq tárbıesin nyǵaıtýǵa baǵyttalǵan túrli is-sharalarmen erekshelenedi.